Edisaun ba dala 18 iha programa “Página do Governo” sei fó sai iha sesta-feira ne’e, loron 6 fulan-marsu tinan 2026, oras tuku 8 kalan, iha Rádiu no Televizaun Timor-Leste (RTTL) no iha plataforma dijitál ofisiál sira.

Edisaun ida-ne’e partisipa hosi Ministra Edukasaun, Dulce de Jesus Soares, ne’ebé aprezenta prioridade, dezafiu no matadalan estratéjiku sira hosi polítika nasionál edukasaun nian, ho destaka fortalesimentu hosi kualidade edukasaun nian liuhosi revizaun kurrikulár no formasaun profesór sira, no mós edukasaun inkluziva, modernizasaun teknolójika iha eskola sira, no valorizasaun ba lian ofisiál sira.  

Durante entrevista, Ministra esplika katak Ministériu ne’e iha área asaun sentrál lima, ne’ebé mak hanesan “kurríkulu, formasaun ba profesór sira, infraestrutura eskolár, jestaun eskolár, no edukasaun inkluziva”. Iha domíniu kurrikulár, nia destaka prosesu ne’ebé la’o hela hodi halo revizaun ba kurríkulu sira iha nivel ensinu oin-oin, ne’ebé dezenvolve hosi ekipa espesialista no profesór sira, ne’ebé inklui faze sira teste nian no projetus-pilotu iha eskolas, produsaun livru no matadalan sira, no mós formasaun ba profesór sira molok implementasaun fazeada.

Ministra subliña mós papél INFORDEPE nian iha formasaun inisiál no kontínua ba profesór sira, inklui mekanizmu mentoria (orientasaun) iha sala-de-aula no estratéjia apoiu ba aprendizajen, hanesan aulas-de-reforsu. Kona-ba dezafius, nia aborda limitasaun sira ne’ebé relasiona ho infraestrutura eskolár no rásiu estudante-turma, no mós kestaun sira hanesan substituisaun profesór reformadu sira no abandonu eskolár, hodi destaka importánsia kolaborasaun ho famílias, lider komunitáriu sira, no asosiasaun inan-aman no profesór sira.

Entrevista ne’e inklui mós esklaresimentu sira kona-ba realidade hosi eskola sira ne’ebé hanaran “eskola internasionál sira”, hodi esplika kuadru lisensiamentu nian no padraun mínimu sira ne’ebé presiza ba operasaun, no mós distinsaun entre lisensiamentu no akreditasaun. Aleinde ne’e, iha entrevista ne’e aborda kona-ba hametin lian Portugés nu’udar lian ofisiál iha edukasaun, inklui dezenvolvimentu eskola CAFE, formasaun profesór sira, no kontestualizasaun konteúdus hodi apoia prosesu aprendizajen. Iha área inovasaun nian, ministru aprezenta medida sira ne’ebé la’o hela ba introdusaun graduál teknolojia nian iha jestaun no prátikas pedagójikas, inklui ferramentas rekolla dadus dijitál nian, formasaun íbrida, no disponibilidade progresiva ekipamentus nian.

Bainhira ezerse ninia kompeténsias, Ministra Edukasaun maka responsavel ba konsepsaun, ezekusaun, koordenasaun no avaliasaun ba polítika públika sira iha área ensinu no kualifikasaun, husikedas edukasaun pré-eskolár to’o ensinu sekundáriu, inklui modalidade edukasaun espesiál, promosaun ba aprendizajen durante moris tomak, no mós konsolidasaun no valorizasaun ba lian ofisiál sira. Nia mós iha kompeténsia atu asegura direitu ba edukasaun, define kurríkulu nasionál, garante kualidade sistema edukativu, no mós promove formasaun no valorizasaun ba profisionál edukasaun sira.

Programa “Página do Governo” hanesan inisiativa ida hosi Gabinete Portavós Governu nian, ne’ebé lidera hosi Ministru Prezidénsia Konsellu Ministrus, Agio Pereira, iha parseria ho RTTL, mídia nasionál no plataforma dijitál sira. Ninia objetivu atu hametin transparénsia governativa no garante asesu populasaun nian ba asaun no desizaun prinsipál sira Ezekutivu nian. Programa ne’e konta ho Nélia Chaves nu’udar aprezentadora no Ika Moniz nu’udar produtora ezekutiva. Apoiu tékniku fornese hosi ekipa mídia Prezidénsia Konsellu Ministrus nian, hosi Gabinete Primeiru-Ministru no gabinete hosi membru Governu ne’ebé hetan entrevista.

Portavós Governu, Ministru Agio Pereira, reafirma katak programa “Página do Governo” hanesan instrumentu importante ida hodi promove prestasaun kontas no diálogu entre Ezekutivu no sidadaun sira.

Governu konvida populasaun tomak atu akompaña edisaun “Página do Governo” ida-ne’e, iha sesta-feira, loron 6 fulan-marsu tinan 2026, oras tuku 8 kalan, iha RTTL no mídia sosiál ofisiál sira.