Ministru Prezidénsia Konsellu Ministrus, Agio Pereira, hala’o sorumutu ho Prezidente Komisaun Funsaun Públika (CFP, sigla iha lian Portugés), Agostinho Letêncio de Deus, akompaña hosi komisáriu Agapito da Conceição, Jorge Paiva Araújo no Anita Tavares Ribeiro de Jesus, hodi analiza pontu situasaun kona-ba servisu ne’ebé dezenvolve husi Komisaun no diskute kona-ba prioridades ba tinan 2026 iha ámbitu reforma administrasaun públika no jestaun rekursus umanus Estadu nian. 

Iha enkontru ne’e, Prezidente CFP aprezenta mós relatóriu ida kona-ba atividade Komisaun nian foin lalais ne’e, inklui akompañamentu ba matéria sira ne’ebé relasiona ho disiplina, reforma obrigatória no jestaun rekursus umanus, ho atensaun espesiál ba setór edukasaun no saúde. Nia refere mós katak sei prepara dokumentu sira ba aprezentasaun iha Konsellu Ministrus, ho hanoin atu define orientasaun estratéjika sira.

Iha ámbitu husi atividade fiskalizasaun institusionál, no membru CFP sira relata katak iha tinan 2026 sei reforsa asaun monitorizasaun iha ministériu no institutu públiku sira, inklui vizita fiskalizasaun ne’ebé hala’o iha koordenasaun ho instituisaun sira seluk Estadu nian. Asaun hirak-ne’e permite ona atu identifika kestaun sira ne’ebé relasiona ho jestaun administrativa no finanseira entidades públikas balun nian.

Durante enkontru, sira diskute mós  kona-ba substituisaun ba profesór sira ne’ebé atinje ona idade reforma, promosaun ba professional  saúde sira no prosesu reforma administrasaun públika nian, ne’ebé inklui propostas ba reorganizasaun karreiras, revizaun ba dimensaun forsa traballu Estadu nian, no mós hametin sistema jestaun no kontrolu ba pagamentus.