Ministru Prezidénsia Konsellu Ministru, Agio Pereira, hala’o sorumutu iha loron 27 fulan-fevereiru tinan 2026, iha Palásiu Governu, Dili, ho Komisáriu Komisaun Anti Korrupsaun (CAC), Rui Pereira dos Santos, akompaña husi nia ekipa.

Enkontru ne’e ho objetivu atu aprezenta estrutura organizasionál CAC nian no esplika kona-ba estatutu servisu no atividade sira ne’ebé dezenvolve iha ámbitu mandatu konstitusionál no legál hodi prevene no kombate korrupsaun.

Iha sorumutu ne’e, Komisáriu aprezenta informasaun atualizada kona-ba funsionamentu institusionál Komisaun nian, rezultadu ne’ebé alkansa ona, dezafiu sira ne’ebé identifika ona iha ezekusaun kna’ar sira, no perspetiva sira atu haforsa CAC nia kapasidade institusionál.

Durante sorumutu ne’e, Ministru simu konjuntu dokumentu no relatóriu institusionál sira ne’ebé relasiona ho atividade Komisaun nian, inklui instrumentu estratéjiku sira, relatóriu anuál sira, asaun monitorizasaun no inisiativa sira sensibilizasaun nian, no mós dokumentasaun ne’ebé enkuadra iha ámbitu kompromisu internasionál sira ne’ebé Timor-Leste hala’o iha ámbitu prevensaun no kombate korrupsaun.