Ministru Negósius Estranjeirus no Kooperasaun, Bendito dos Santos Freitas, akompaña Prezidente Repúblika, José Ramos-Horta, iha Segmentu Altu Nivel hosi Sesaun 61 Konsellu Direitus Umanus Nasoins Unidas nian, ne’ebé hala’o iha loron 23 no 24 fulan-fevereiru tinan 2026, iha Jenebra, Suisa. 

Segmentu Altu Nivel ne’e halibur Xefe Estadu no Governu sira, Ministru nunemós reprezentantes hosi Estadus-Membrus Nasoins Unidas nian atu diskute prioridades globais kona-ba direitus umanus, hametin diálogu internasionál no promove kooperasaun multilaterál.

Iha sesaun abertura, Timor-Leste reafirma ninia kompromisu hodi promove no proteje direitus umanus, justisa tranzitóriu, nomós hametin Estadu Direitu. Iha ninia diskursu, Prezidente Repúblika destaka esperiénsia nasionál hodi promove pás, rekonsiliasaun, no memória, no subliña Timor-Leste nia kontribuisaun iha debate internasionál kona-ba sosiedades ne’ebé inkluziva no reziliente.

Durante sesaun ne’e, Timor-Leste kondena violasaun direitus umanus no direitu umanitáriu internasionál hotu, ho apelu protesaun ba ema sivíl sira, responsabilizasaun ba autór violasaun hirak-ne’e, no garantia asesu umanitáriu ne’ebé seguru no sein iha impedimentu.

Iha tempu hanesan Segmentu Altu Nivel nian, Ministru Negósius Estranjeirus no Kooperasaun akompaña Xefe Estadu hala’o sorumutu bilaterál ho Altu Komisáriu Nasoins Unidas ba Direitus Umanus, Volker Türk, Ministrus Negósius Estranjeirus Repúblika Kirjizistaun, Jeenbek Kulubaev, Ministru Negósius Estranjeirus Repúblika Angola, Teté António,  no  Diretór-Jerál Organizasaun Mundiál Saúde nian, Tedros Adhanom Ghebreyesus.

Durante vizita ne’e, asina ona mós  akordu ida atu estabelese relasoins diplomátikas entre Timor-Leste no Repúblika Kirjizistaun, hodi estabelese enkuadramentu formál ba dezenvolvimentu kooperasaun bilaterál.