Vise-Ministru Asuntus Parlamentares, Adérito Hugo da Costa, ohin, loron 26 fulan-fevereiru tinan 2026, partisipa iha gravasaun ba epizódiu foun hosi programa “Página do Governo”, ne’ebé dedika ba ninia papél iha artikulasaun institusionál entre Governu no Parlamentu Nasionál, iha kuadru Governu Konstitusionál IX nian.

Durante entrevista,  ko’alia kona-ba kompeténsias Vise-Ministru Asuntus Parlamentares iha apoiu ba Ministru Prezidénsia Konsellu Ministrus, liuliu iha konsesaun (kriasaun), ezekusaun, koordenasaun no avaliasaun ba polítika governativa iha área asuntus parlamentares nian, no mós iha koordenasaun regulár ho Parlamentu Nasionál. Aborda mós kona-ba mekanizmus koordenasaun institusionál, reprezentasaun Governu iha Konferénsia Reprezentantes Bankadas Parlamentares no iha sesaun plenária Parlamentu Nasionál, no mós importánsia hosi diálogu konstrutivu entre órgaun soberania sira.

Programa “Página do Governo” promove husi Gabinete Portavós Governu, ne’ebé lidera husi Ministru Prezidénsia Konsellu Ministrus, Agio Pereira. Programa ne’e prodús iha parseria ho Rádiu no Televizaun Timor-Leste no mídia nasionál sira, ho objetivu atu reforsa transparénsia governativa, prestasaun kontas no asesu sidadaun sira nian ba informasaun kona-ba desizaun no polítika prinsipál sira Ezekutivu nian.

Programa ne’e konta ho Nélia Chaves nu’udar aprezentadora no ho Ika Moniz hanesan produtora ezekutiva. “Página do Governo” sai hanesan espasu ida ba diálogu institusionál, ne’ebé foka liu ba interese públiku nian, atu bele garante  populasaun nia asesu ba asaun no desizaun prinsipál sira Ezekutivu nian.

Epizódiu ohin nian, hamutuk ho Vise-Ministru Asuntus Parlamentares, sei tranzmite iha tempu badak nia laran iha RTTL no iha plataforma dijitál no rede sosiál sira Governu nian.

Programa hotu-hotu ne’ebé tranzmite ona disponivel iha kanál YouTube @PCMPAGINADOGOVERNOTIMORLESTE