Primeiru-Ministru, Kay Rala Xanana Gusmão hahú vizita traballu ida ba munisípiu sira iha loron 24 fulan-fevereiru tinan 2026, ho viajen dahuluk ne’ebé hala’o hosi loron 24 to’o loron 28 fulan-fevereiru, kobre Likisá, Ermera, Aileu no Manatutu. 

Vizita ne’e integra iha siklu dezlokasaun ba munisípiu sira, ne’ebé prevee ona ba fulan-fevereiru no fulan-marsu, ho objetivu atu observa funsionamentu servisu munisípiu sira nian iha terrenu no rekolla informasaun kona-ba rezultadu hosi Avaliasaun ba Kondisoins Mínimas ne’ebé nesesáriu atu kria autarkia munisipál sira, inklui análize ba kapasidade administrativa, finanseira no infraestruturál sira Autoridade Munisipál ida-idak nian. Programa ne’e halo parte iha serbisu preparatóriu Governu Konstitusionál IX nian iha ámbitu prosesu desentralizasaun administrativa no podér lokál, inklui identifikasaun ba nesesidades hodi hadi’a koordenasaun institusionál no prestasaun servisu ba populasaun.

Iha etapa dahuluk, iha Likisá, Primeiru-Ministru hasoru malu ho autoridade munisipál sira iha Salaun Tokodede, iha Likisá Vila, iha ne’ebé aprezenta atividade munisípiu nian no hala’o sesaun diálogu ida ho husu no hatán, tuir fali ho orientasoins ne’ebé dirije ba estrutura governasaun lokál sira.

Durante lokraik, Primeiru-Ministru vizita projetu no inisiativa sira ne’ebé implementa ona iha munisípiu ne’e, inklui intervensoins iha ámbitu Planeamentu Dezenvolvimentu Integradu Munisipál (PDIM) no Programa Nasionál Dezenvolvimentu Suku (PNDS), asaun sira ne’ebé relasiona ho implementasaun programa merenda eskolár, no mós atividades iha setór saúde no agrikultura. Viajen ne’e inklui mós vizita hodi observa direta infraestrutura no servisu sira, liuliu eskola ensinu báziku ida iha Likisá Vila, área turizmu komunitáriu Kaitehu (Suku Mota-Ulun, postu administrativu Bazartete)  no estrutura sira saúde nian, inklui inaugurasaun ba sala konsulta ida iha Sentru Saúde Maubara no vizita ba maternidade iha Maumeta.

Primeiru-Ministru akompaña hosi delegasaun governamentál ne’ebé inklui, Ministru Administrasaun Estatál, Tomás do Rosário Cabral, entre membru governu sira seluk.

Kontinuasaun ba vizita ne’e iha loron 25, 26, no 27 fulan-fevereiru iha munisípiu Ermera, Aileu, no Manatutu. Faze daruak sei hala’o hosi loron 8 to’o 12 fulan-marsu, ne’ebé sei kobre munisípiu Manufahi, Ainaru, Kovalima no Bobonaru. Faze datoluk prevee ona ba loron 15 to’o 18 fulan-marsu, ho dezlokasaun ba munisípiu Lautein, Baucau no Vikeke.