Edisaun da-17 hosi programa “Página do Governo” sei transmite iha sesta-feira ida-ne’e, loron 20 fulan-fevereiru tinan 2026, tuku 8 kalan iha Rádiu no Televizaun Timor-Leste (RTTL) no iha plataformas dijitais ofisiais. Edisaun ida-ne’e konta ho partisipasaun hosi Ministru Juventude, Desportu, Artes no Kultura, Nelyo Isaac Sarmento, ne’ebé aprezenta prioridades no programas prinsipais Ministériu nian iha área juventude, desportu, artes no kultura, nune’e mós medida sira ne’ebé la’o hela iha tinan 2026. 
Durante entrevista ne’e, Ministru destaka nu’udar área prioritária sira maka reforsu infraestrutura desportiva, apoiu ba federasaun sira no atletas ho prestasaun aas, formasaun no kapasitasaun lider foin-sa’e sira liuhosi sentru juveníl no programa Parlamentu Foin-sa’e, nune’e mós promosaun no internasionalizasaun kultura timoroan nian.
Iha área desportu nian, aborda investimentu iha kampu no sentru desportu foun sira iha kapitál no munisípiu sira, apoiu ba modalidade prioridade sira hanesan futeból, bokse, karaté, taekwondo no atletizmu, no mós mekanizmu sira hodi insentiva no rekoñese méritu hosi atletas iha kompetisaun internasionál sira.
Iha área arte no kultura, Ministru subliña serbisu valorizasaun espresaun tradisionál nian sira, kria kondisoins ba rejistu no protesaun direitu autór nian, no mós estratéjia hodi apoia artistas iha utilizasaun plataformas dijitais no internasionalizasaun ba sira-nia produsaun sira.
Entrevista ne’e aborda mós kona-ba mekanizmu monitorizasaun no transparénsia iha jestaun ba apoiu ne’ebé fó, nune’e mós vizaun estratéjika Ministériu nian hodi hametin karakter, sidadania no envolvimentu síviku foin-sa’e timoroan sira-nian.
Programa “Página do Governo” hanesan inisiativa ida hosi Gabinete Portavós Governu nian, ne’ebé lidera hosi Ministru Prezidénsia Konsellu Ministrus, Agio Pereira, iha parseria ho RTTL, mídia nasionál no plataforma dijitál sira. Ninia objetivu atu hametin transparénsia governativa no garante asesu populasaun nian ba asaun no desizaun prinsipál sira Ezekutivu nian. Programa ne’e konta ho Nélia Chaves nu’udar aprezentadora no Ika Moniz nu’udar produtora ezekutiva. Apoiu tékniku fornese hosi ekipa mídia Prezidénsia Konsellu Ministrus nian, hosi Gabinete Primeiru-Ministru no gabinete hosi membru Governu ne’ebé hetan entrevista.
Portavós Governu, Ministru Agio Pereira, reafirma katak programa “Página do Governo” hanesan instrumentu importante ida hodi promove prestasaun kontas no diálogu entre Ezekutivu no sidadaun sira.
Governu konvida populasaun tomak atu akompaña edisaun “Página do Governo” ida-ne’e, iha sesta-feira, loron 20 fulan-fevereiru tinan 2026, tuku 8 kalan, iha RTTL no rede sosiál sira.