Ministra Saúde, Élia A. A. dos Reis Amaral, no Diretór-Jerál Ministériu Edukasaun, Apolinário Serpa Rosa, sai sasin ba asinatura kontratu subvensaun, iha loron 10 fulan-fevereiru tinan 2026, iha Embaixada Japaun nian iha Dili, ba konstrusaun postu saúde ida iha munisípiu Ainaru no eskola ensinu báziku ida iha Ataúru. 

Kontratu ne’e asina hosi Embaixadór Japaun iha Timor-Leste, Yamamoto Yasushi, ho organizasaun Haburas Dezenvolve Talento (HADEZTA) no ho Asosiasaun Hanoin ba Futuru Juventude (AHFJ), ne’ebé nu’udar entidades ne’ebé responsavel ba ezekusaun hosi projetus ida-idak.

Projetu postu saúde ne’e sei hala’o husi HADEZTA iha Suku Nunumoge, Postu Administrativu Hatubuiliku, munisípiu Ainaru, ho objetivu atu hadi’a asesu ba kuidadu saúde primáriu, liuliu ba inan no labarik sira, no reforsa prestasaun servisu báziku iha área rurál. Infraestrutura foun ne’e sei integra iha Sistema Nasionál Saúde, iha koordenasaun ho Ministériu Saúde, Servisu Munisipál Saúde, no autoridade administrativa no mós lokál sira.

Iha Ataúru, AHFJ sei harii eskola ensinu báziku ida iha Suku Makadade, ho objetivu atu habelar asesu ba edukasaun no hadi’a kondisaun aprendizajen labarik sira nian iha komunidade ne’e.

Iha serimónia ne’e hetan mós partisipasaun husi Prezidente Autoridade Munisipál Ainaru, Prezidente Autoridade Administrativa Ataúru, reprezentantes hosi HADEZTA no AHFJ, no mós lideransa komunitária sira.