Ohin, loron 10 fulan-fevereiru tinan 2026, Ministru Ensinu Superiór, Siénsia no Kultura, José Honório da Costa Pereira Jerónimo, partisipa iha gravasaun epizódiu foun hosi programa “Página do Governo”, hanesan parte ida hosi entrevista balu ho membrus Governu Konstitusionál IX. 

Iha entrevista ne’e, Ministru José Honório ko’alia kona-ba orientasaun no dezafiu prinsipál sira hosi polítika nasionál ba ensinu superiór, siénsia no teknolojia, ho foku hadi’a kualidade ensinu universitáriu, reforsa kualifikasaun korpu dosente, promove oportunidade hanesan hodi asesu ba ensinu superiór, nune’e mos hametin ligasaun entre instituisaun ensinu no setór produtivu sira.

Entrevista ne’e mós koa’lia  kona-ba koordenasaun no regulasaun sistema ensinu superiór, loke tan ensinu tékniku superiór iha rejiaun oioin nasaun nian, no mós kooperasaun internasionál iha área akadémika no sientífika.

Promove hosi Gabinete Portavós Governu, ne’ebé lidera hosi Ministru Prezidénsia Konsellu Ministrus, Agio Pereira, programa “Página do Governo” ne’e prodús iha parseria ho Rádiu no Televizaun Timor-Leste no órgauns komunikasaun nasionál, ho objetivu atu reforsa transparénsia governativa, prestasaun kontas  no sidadaun sira-nia asesu ba informasaun kona-ba polítika no desizaun Ezekutivu nian.

Epizódiu ne’e hamutuk ho Ministru Ensinu Superiór, Siénsia no Kultura, sei fó sai iha tempu badak iha RTTL no iha plataforma dijitál no rede sosiál Governu nian. Programa sira ne’ebé tranzmite antes ne’e disponivel iha kanál ofisiál YouTube @PCMPAGINADOGOVERNOTIMORLESTE.

▶️ Klik iha ne’e atu haree epizódiu sira hotu iha Youtube
“Página do Governo”