Grupu Traballu Interministeriál Siberseguransa (GICS-akrónimu iha lian portugés) hala’o enkontru tékniku iha loron 9 fulan-fevereiru iha Palásiu Governu, iha Dili, ne’ebé prezide hosi Ministru Prezidénsia Konsellu Ministrus, Agio Pereira, iha ámbitu implementasaun Despaxu n. 021/PM/X/2025, ne’ebé kria mekanizmu koordenasaun interministeriál ida ne’e. 

Objetivu prinsipál hosi enkontru ne’e maka halo análize téknika no rekolla kontribuisaun husi espesialista sira kona-ba pakote siberseguransa nian, ne’ebé foka ba enkuadramentu legál, institusionál, no operasionál ne’ebé nesesáriu ba protesaun sistema krítiku nasionál, liuliu kabu submariñu fibra ótika (Timor-Leste South Submarine Cable – TLSSC), infraestrutura estratéjika ida ba soberania dijitál no seguransa nasionál.

Grupu Traballu Interministeriál Siberseguransa ne’e kompostu husi membru Governu no líder sira hosi instituisaun prinsipál Estadu nian, no inklui ho Ministru Prezidénsia Konsellu Ministrus, hanesan líder polítiku no prezidente grupu, Ministru Transporte no Komunikasaun, no Ministru Justisa. Grupu ne’e inklui mós partisipasaun hosi Diretór-Jerál Servisu Nasionál Intelijénsia Estratéjiku (SNIE), nu’udar koordenadór tékniku, no Diretór TIC Timor, nu’udar vise koordenadór tékniku adjuntu, entre entidade nasionál sira seluk ho kompeténsia iha área seguransa, justisa, komunikasaun, no supervizaun finanseira.

Sorumutu ne’e marka inísiu ho sesaun téknika no institusionál balun, ne’ebé hala’o husi loron 9 to’o 12 fulan-fevereiru, inklui enkontru ho Ministériu Transporte no Komunikasaun, Servisu Nasionál Intelijénsia Estratéjiku, Unidade Informasaun Finanseira Banku Sentrál Timor-Leste, no entidade sira setór justisa nian, ho objetivu atu hametin preparasaun nasionál iha área seguransa dijitál nian.