Ministru Komérsiu no Indústria, Filipus Nino Pereira, partisipa iha Forum Turizmu ASEAN (ATF) 2026 no sorumutu relevantes, ne’ebé hala’o husi loron 28 to’o loron 30 fulan-janeiru tinan 2026, iha sidade Cebu, Filipinas, hodi reprezenta Vise-Primeiru-Ministru no Ministru Turizmu no Ambiente, Francisco Kalbuadi Lay. 

ATF hanesan sorumutu anuál prinsipál rejiaun nian iha área turizmu, hodi halibur ministru sira ne’ebé responsavel ba área ne’e, organizasaun nasionál turizmu no reprezentantes setór públiku no privadu Estadus-Membrus Asosiasaun Nasoins Sudeste Aziátiku nian. Forum ne’e integra reunioens ministeriais, téknikas no grupu traballu sira durante semana ida, ho objetivu atu promove kooperasaun rejionál, aliñamentu polítika no dezenvolvimentu sustentavel setór turístiku nian.

Durante Forum ne’e, Ministru Komérsiu no Indústria hala’o almosu traballu ida ho Sekretáriu-Jerál Adjuntu ASEAN ba Komunidade Ekonómika ASEAN (AEC),  Satvinder Singh. Sorumutu ne’e fó oportunidade hodi troka hanoin kona-ba integrasaun Timor-Leste iha kooperasaun ekonómika no turístika ASEAN, ho foku ba dezenvolvimentu turizmu, preparasaun ba investimentu, mekanizmu finansiamentu no dezenvolvimentu kapitál umanu.

Sekretáriu-Jerál Adjuntu ASEAN fó saudasaun ba envolvimentu ativu Timor-Leste iha kooperasaun turístika rejionál no destaka preparativus país nian hodi sai uma-na’in, iha fulan-outubru tinan 2026, ninia sorumutu dahuluk husi grupu traballu turizmu ASEAN nian. Ida-ne’e sei sai konkista importante ida iha prosesu integrasaun Timor-Leste iha organizasaun rejionál ne’e.

Sorumutu ne’e destaka mós perspetiva pozitiva ba setór turizmu Timor-Leste nian, ne’ebé hetan apoiu hosi ligasaun aérea ne’ebé di’ak, oportunidade emerjente iha turizmu ró kruzeiru nian (ró boot ne’ebé tula pasajeirus hodi pasa férias no vizita fatin turístiku sira), no mós identifikasaun área  prioritária sira ba investimentu iha infraestrutura no servisu turístiku.