Primeiru-Ministru Australianu, Anthony Albanese, to’o ohin iha Dili, loron 28 fulan-janeiru, hodi hala’o vizita ofisiál ba Timor-Leste, ninia viajen ofisiál dahuluk ba nasaun ne’e dezde simu pose.

Vizita ne’e hahú ho to’o iha Aeroportu Internasionál Prezidente Nicolau Lobato, tuir fali ho serimónia ofisiál benvindu iha Palásiu Prezidensiál, ne’ebé prezide hosi Prezidente Repúblika, José Ramos-Horta. Programa ne’e inklui enkontru institusionál altu nivel, liuliu enkontru ho Prezidente Repúblika, ho Primeiru-Ministru, Kay Rala Xanana Gusmão, no sesaun solene ida iha Parlamentu Nasionál, iha ne’ebé Primeiru-Ministru australianu sei halo diskursu iha plenáriu.

Iha Palásiu Governu, Xefe Governu na’in-rua ne’e sei prezide reuniaun bilaterál entre delegasaun Timor-Leste no Austrália no mós asina dokumentu “New Partnership for the New Era” (“Parseria Foun ba Era Foun”), tuir fali konferénsia imprensa konjunta ida. Ajenda ne’e inklui mós kondekorasaun Grande Kolár Orden Timor-Leste ba Anthony Albanese no jantár ofisiál ida ne’ebé oferese hosi Primeiru-Ministru, Kay Rala Xanana Gusmão, iha Palásiu Nobre Lahane.

Vizita ofisiál ne’e konklui iha Kinta dadeer, loron 29 fulan-janeiru, ho Anthony Albanese nia regresu ba Austrália.