Sekretáriu Estadu Dezenvolvimentu Lokál, Mateus W. dos Santos Tallo, ne’ebé akompaña hosi Prezidente Autoridade Munisipál Baukau, Veneranda Lemos Martins, iha loron 20 fulan-janeiru tinan 2026, inaugura projetu reabilitasaun rua, ida estrada no ida seluk eskola ida iha Kelikai, iha Suku Makalaku, Postu Administrativu Kelikai, Munisípiu Baukau. 

Projetu reabilitasaun estrada betaun ho nia estensaun kilómetru rua ne’e, iha orsamentu maizumenus dolar amerikanu rihun 34, nomos reabilitasaun eskola siklu da-3, ho sala aula nian tolu, reprezenta investimentu dolar amerikanu rihun 22, projetu rua-ne’e finansia hosi Programa Nasionál Dezenvolvimentu Suku.

Iha ninia intervensaun, Sekretáriu Estadu hato’o ninia satisfasaun ba konkluzaun projetus ne’e, hodi salienta katak, reabilitasaun estrada ne’e sei fó benefísiu ba populasaun lokál, hodi kontribui ba dinamizasaun ekonomia, hadi’a asesu ba bee, eletrisidade no servisus esensiais seluk.

Mateus Tallo destaka mós katak entrega infraestrutura eskolár foun ne’e nu’udar investimentu ida ba labarik sira-nia futuru no nasaun nian, hodi fó hanoin katak prioridade ida hosi PNDS maka hadi’a no moderniza infraestruturas edukativas iha áreas rurais. Iha ninia diskursu ikus, nia apela ba autoridade lokál sira no komunidade atu halo prezervasaun no manutensaun ba obra sira, hodi nune’e bele garante ninia durabilidade ba tempu naruk.

Xefe Suku Makalaku hato’o ninia satisfasaun no orgullu ba konkretizasaun projetus ne’e, hodi konsidera katak projetus ne’e responde ba nesesidade reál komunidade nian, liuliu iha asesu ba edukasaun no hadi’a konektividade, fó impaktu ba dezenvolvimentu ekonómiku lokál, asesu ba saúde, ligasaun ba merkadu no atividade ekonómika loroloron nian.

Serimónia ne’e konta mós ho prezensa husi diretores administrasaun públika, Xefe Gabinete Autoridade Munisipál Baucau nian, reprezentantes PNTL no F-FDTL, Administradór Postu Administrativu, autoridades suku, veteranus, membrus ekipa PNDS iha nivel suku, nune’e mós komunidade lokál no estudante sira.