Iha kinta, loron 22 fulan-janeiru tinan 2026, Governu tau fatuk dahuluk ba konstrusaun Sentru Inkubasaun Negósius iha Suku Vila Verde, Postu Administrativu Vera Cruz, Dili, iha serimónia ida ne’ebé prezide husi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay. 

Sentru foun ne’e ho objetivu atu apoia kriasaun no dezenvolvimentu negósiu foun sira, liuliu empreza mikro, ki’ik no médiu sira, liuhosi orientasaun, mentoria no hasae kapasidade, hodi kontribui ba hamenus risku sira ne’ebé hasoru iha faze inisiál atividade nian no ba promosaun empreendedorizmu nasionál.

Iha ninia diskursu, Vise-Primeiru-Ministru afirma katak Sentru Inkubasaun Negósius “la’os de’it konstrusaun fízika ida”, maibé ida-ne’e “espasu ida ba oportunidade no esperansa, iha ne’ebé hanoin buras no iha ne’ebé joven sira no mós emprezáriu sira hetan apoiu, orientasaun no insentivu hodi transforma sira-nia ambisaun sira sai realidade.”

Governante ne’e afirma mós katak projetu ne’e aliña ho vizaun Governu nian ba ekonomia ida ne’ebé diversifikadu no sustentável liu, hodi subliña katak “Timor-Leste iha vizaun ida ne’ebé klaru atu harii ekonomia ida ne’ebé ladún dependente ba petróleu no gás, iha kapasidade atu kria empregu no hametin negósiu lokál sira, liuliu empreza mikro, ki’ik no médiu sira”.

Sentru Inkubasaun Negósius nian ho objetivu atu funsiona hanesan espasu ida ne’ebé apoia inovasaun no inisiativa emprezariál, hodi promove ligasaun emprendedór sira nian ho finansiamentu no investimentu, dezenvolvimentu abilidade jestaun no integrasaun progresiva negósius nian iha ekonomia formál.

Projetu ne’e lokaliza iha zona Matadouru, Vila Verde, Vera Cruz, Dili, ho durasaun ne’ebé prevee ba loron 365 no orsamentu dolar amerikanu millaun 3,16.

Serimónia ne’e sura ho partisipasaun hosi membrus Governu no Parlamentu Nasionál, reprezentantes husi setór emprezariál, autoridade lokál no konvidadu sira seluk.