Governu Timor-Leste oferese rai no edifísiu ida, ne’ebé lokaliza iha área Farol, Dili, ba estabelesimentu Embaixada Repúblika Demokrátika Popular Laos, nune’e mós Laos disponibiliza rai ida iha Vientiane ba misaun diplomátika Timor-Leste nian iha país ne’ebá. 

Serimónia entrega ne’e hala’o iha loron 20 fulan-janeiru tinan 2026, durante vizita ofisiál Vise-Ministra Negósius Estranjeirus Repúblika Demokrátika Popular Laos nian, Phongsamouth Anlavan, iha Dili, entre loron 18 no 21 fulan-janeiru, no reflete prinsípiu resiprosidade ne’ebé maka karakteriza ona relasoins bilaterais entre Dili no Vientiane.

Serimónia ne’e asiste hosi Ministru Justisa, Sérgio Hornai, Embaixadór Timor-Leste ba Repúblika Demokrátika Populár Laos, João Câmara, Diretór-Jerál ba Asuntus Bilaterais Ázia no Oseánia, Jorge Camões, Diretora-Jerál ba Asuntus ASEAN, Elisa Maria da Silva, no mós Dirijente sira seluk hosi Ministériu Negósius Estranjeirus no Kooperasaun no membrus korpu diplomátiku.

Durante vizita ne’e, Vise-Ministra Phongsamouth Anlavan destaka liu tinan 20 relasoins diplomátikas entre país rua ne’e no konsidera estabelesimentu Embaixada Laos nian iha Dili, iha tempu badak, hanesan rezultadu konkretu ida hosi kooperasaun ne’e. Dezde estabelesimentu relasoins diplomátikas iha tinan 2002, Timor-Leste no Laos dezenvolve ona interkámbiu altu nivel, selebra akordu bilaterál no promove kooperasaun entre sira-nia povu.

Governu Laos mós fó saudasaun ba adezaun Timor-Leste nian ba ASEAN, ne’ebé realiza iha tinan kotuk, hodi subliña katak harii embaixada sira iha Estadus-Membrus hanesan prátika obrigatória ida iha organizasaun rejionál nia laran.

Daudaun ne’e, Estadus-Membrus ASEAN ne’ebé estabelese ona sira-nia embaixada iha Dili inklui Indonézia, Singapura, Brunei Darussalam, Filipinas, Tailándia, Kamboja, Malázia no Myanmar, ho Laos iha faze finál hodi kompleta ninia prosesu. Timor-Leste konklui ona estabelesimentu ba ninia embaixada sira iha Estadus-Membrus sanulu seluk ASEAN nian.