iha loron 17 fulan-janeiru tinan 2026, Vise-Primeiru-Ministru no Ministru Dezenvolvimentu Rurál no Abitasaun Komunitária, Mariano Assanami Sabino, akompaña husi Prezidente Autoridade Administrativa Ataúro, Mateus Belo, halo lansamentu ba Programa Dezenvolvimentu Rurál no Revitalizasaun Komunitária, iha serimónia ne’ebé hala’o iha Suku Beloi ho objetivu atu apoia inisiativa ekonómika komunitária no hasa’e ekonomia lokál. 

Programa Revitalizasaun Komunitária implementa hela iha aldeia alvu tolu iha illa Ataúro: Usobemasu, iha Suku Beloi; Eklae, iha Suku Vila-Maumeta; no Fatulela, iha Suku Makili.  Aldeia sira-ne’e halo parte iha grupu komunitáriu neen, ne’ebé maioria foka liu ba atividade peska, pekuária (hakiak animál) no turizmu akuátiku.

Iha setór peskas, grupu Fitun Laloran prepara ona ró ida hodi fó apoiu ba atividade peska. Grupu snorkelling ida hetan ona ró ida no ekipamentu luku nian hodi vizitante sira ne’ebé iha interese ba ekosistema tasi aluga. Iha área pekuária, grupu Naroma dezenvolve atividade hakiak fahi no manu. Grupu Rental Motor fornese servisu aluga motor ba vizitante sira ne’ebé halo viajen hale’u illa.

Durante serimónia ne’e, Vise-Primeiru-Ministru enkoraja membru grupu sira atu mantein sira-nia kompromisu no garante jestaun di’ak ba atividade sira, ho objetivu atu garante retornu sustentável, hadi’a ekonomia familiár no promove hamosu emprendedór lokál ki’ik sira.  Nia subliña mós nesesidade atu proteje ambiente terrestre no tasi hodi bele prezerva illa nia beleza naturál no mantén ninia atrasaun turístika, nune’e garante impaktu ekonómiku pozitivu sira ba Ataúro.

Mariano Assanami Sabino afirma mós katak Ataúro hanesan prioridade ida ba Governu, ne’ebé sei kontinua investe iha dezenvolvimentu ekonomia lokál no infraestruturas bázikas. Nia destaka progresu ne’ebé halo ona iha rede rodoviária, ne’ebé permite ona asesu ba komunidade sira ne’ebé uluk izoladu, iha ne’ebé ligasaun liu de’it hosi tasi, no mós potensiál ba turizmu relijiozu no natureza ne’ebé relasiona ho tasi, ahu-ruin no paizajen naturál sira.

Iha loron tuir mai, Vise-Primeiru-Ministru, iha kualidade hanesan Ministru Koordenadór Asuntus Sosiais, vizita mós obra konstrusaun igreja kristaun rua iha Illa Ataúro, ne’ebé hetan apoiu finanseiru husi Gabinete Apoiu ba Sosiedade Sivíl, instituisaun ida ne’ebé iha nia tutela.