Ministru Administrasaun Estatál, Tomás do Rosário Cabral, iha loron 15 fulan-janeiru tinan 2026, hala’o vizita traballu ida ba Illa Ataúro, iha ne’ebé inaugura infraestruturas iha área edukasaun no abastesimentu bee-moos no mós akompaña progresu projetu konstrusaun rodoviária no eskola ne’ebé la’o hela. 
Iha Suku Makadade, Ministru inaugura projetu kanalizasaun bee no Eskola Ensinu Báziku 1º no 2º Siklu Paralelu Ili-Timur, ne’ebé finansia hosi Programa Nasionál Dezenvolvimentu Suku. Sistema kanalizasaun ne’e garante fornesimentu bee ba komunidade lokál, inklui eskola, hosi bee-matan sira ne’ebé lokaliza iha Era’ir, liuhosi rezervatóriu intermédiu ba Ili-Timur. Eskola ne’e iha sala-aula rua no sala ida ba profesór sira, no ekipada atu simu estudante na’in-57.
Durante serimónia ne’e, Ministru husu atu uza bee ho responsabilidade hodi garante sistema nia durabilidade, agradese ba komunidade nia envolvimentu iha projetu ne’e, no husu atu autoridade lokál no profesór sira halo akompañamentu filafali ba merenda eskolár durante fulan-janeiru.
Nune’e mós iha vizita ne’e, Governante ne’e observa diretamente progresu obra manutensaun estrada ne’ebé liga aldeia Arlo no Adara, iha Suku Beloi, ho distánsia liu kilómetru 14. Projetu ne’e hetan finansiamentu hosi Fundu Espesiál Dezenvolvimentu Ataúro no ho objetivu atu hadi’a konektividade interna iha illa ne’e, hodi fasilita asesu ba servisus públikus, eskolas, sentru saúde sira no atividade ekonómika lokál sira.
Programa ne’e inklui mós inaugurasaun ba sala-aula foun sira iha Eskola Sekundária 99 Ataúru, iha aldeia Ileticaraquia, iha Suku Vila Maumeta. Infraestrutura ne’e, ne’ebé finansia mós hosi Fundu Espesiál Dezenvolvimentu Ataúru, inklui sala-aula tolu no sala ida ba profesór sira, no prepara hela hodi hahú atividade letiva.
Atividade sira ne’e hetan partisipasaun husi Prezidente Autoridade Administrativa Ataúro, dirijentes husi Ministériu Administrasaun Estatál, autoridade lokál sira, forsas seguransa, profesór sira, estudantes no membru komunidade sira ne’ebé envolve.