Loron 15 fulan-janeiru tinan 2026, iha Dili, Vise- Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, simu delegasaun parlamentár ida husi Japaun, iha sorumutu ida ne’ebé marka prezensa husi Vise-Ministru ba Asuntus Parlamentares, Adérito Hugo da Costa. 

Sorumutu ne’e nu’udar parte hosi akompañamentu projetus Asisténsia Ofisiál ba Dezenvolvimentu (ODA) ne’ebé finansia husi Japaun iha Timor-Leste, nune’e mós diálogu kona-ba kooperasaun bilaterál iha área sira hanesan infraestrutura, saúde no edukasaun.

Delegasaun parlamentár japoneza ne’e kompostu husi reprezentantes husi forsas polítikas tolu,  hanesan Ishida Masahiro no Adachi Masashi, hosi Partidu Liberál Demokrata, Koga Chikage, hosi Partidu Demokrata Konstitusionál, no Ueda Kiyoshi, hosi Partidu Demokrata. Reprezentante sira ne’e akompaña husi Embaixadór Japaun iha Timor-Leste, Yamamoto Yasushi.

Iha sorumutu ne’e, parte rua mós diskute kona-ba kestaun sira ne’ebé iha relasaun ho investimentu japonés iha Timor-Leste, inklui asuntu sira ne’ebé liga ho setór privadu, reforsu kuadru legál, implementasaun projetus no mekanizmu fiskalizasaun ne’ebé relasiona ho programa dezenvolvimentu ne’ebé hetan apoiu husi país parseiru sira.

Vise-Primeiru-Ministru subliña kooperasaun bilaterál iha reforsu setór estratéjiku sira no rekoñese kontribuisaun povu japonés nian ba Timor-Leste dezde períodu difisil liu iha prosesu dezenvolvimentu nasionál.

Vise-Ministru ba Asuntus Parlamentares salienta katak vizita ne’e fó mós oportunidade atu ko’alia kona-ba kooperasaun entre órgauns soberania país rua ne’e nian, liu-liu entre ida-idak nia parlamentu, hodi destaka mós Japaun nia apoiu kontínuu  ba projetu importante sira, inklui investimentu iha setór indústria naval iha Postu Administrativu Laleia, munisípiu Manatutu.

Vizita ne’e nu’udar parte hosi relasionamentu institusionál regulár entre Timor-Leste no Japaun no mós akompañamentu ba projetu kooperasaun sira ne’ebé la’o hela.