Sekretáriu Estadu Politika Enerjétika, Avelino Coelho, asina iha semana liu ba, akordu ho xefi suku nain 6 hosi distritu Ainaro. Ho objetivu atu implementa politika Sekretaria Estadu Politika Enerjétika (SEPE) kona-ba enerjia solár panel.

“Enerjia solar panél hanesan buat foun ida ne’ebé kapas tebes, tanba durante ne’e povu la hetan maibé agora povu bele hetan. Ba suku neen ne’ebé ohin asina akordu ne’e, tanba suku sira ne’e tuir ona kritéria, tanba suku sira ne’e izoladu duni no tama ba kategoria planu eletrifikasaun rurál”, hateten Avelino Coelho

Iha fatin hanesan Eduardo G. da Silva, xefi suku Foho Ailiku distritu Ainaro, informa katak “Uluk ami nia suku nakukun, maibé liu hosi asina akordu ida ne’e, hau nia povu bele hetan uitoan naroman no sira bele kontente, tanba hela iha suku ne’ebé iha área rurál, kareta nunka tama, maibé sira bele hetan naroman ona”.

Suku sira ne’ebé mak asina akordu ho SEPE mak hanesan, suku Foho Ailiku, Manetu, Edy, Manlobas, Aili no suku Liurai.