Ministru Ensinu Superiór, Siénsia no Kultura hala’o misaun ofisiál ida ba Indonézia iha loron 5 to’o loron 7 fulan-janeiru tinan 2026, akompaña hosi delegasaun ida hosi Ministériu Ensinu Superiór, Siénsia no Kultura (MESCC, sigla iha lian portugés), ho objetivu atu hametin kooperasaun internasionál iha dezenvolvimentu ensinu superiór iha Timor-Leste, ho foku ba área siénsia no teknolojia nian. 

Hanesan parte husi misaun refere, delegasaun halo viajen ba Jember, iha ne’ebé sira vizita Institutu Siénsia no Teknolojia Mandala, no ba Surabaya, iha ne’ebé sira hala’o enkontrus institusionais  ho Universidade Estatál Surabaya (UNESA, Akrónimu iha lian indonézia).

Iha enkontrus ne’e bele hetan ona entendimentu kona-ba implementasaun programa investigasaun hamutuk, atribuisaun bolsas estudu, interkámbiu profesór no estudante sira, no mós asaun formasaun ba profesór sira, tuir prioridades estratéjikas ne’ebé define ona hosi MESCC.

Hanesan rezultadu imediatu husi misaun ne’e, MESCC hetan asesu ba bolsas estudu 100 ne’ebé oferese husi UNESA iha nivel lisensiatura, mestradu no doutoramentu iha área prioridade ba Timor-Leste, no mós bolsas estudu 20 ne’ebé fornese husi Institutu Siénsia no Teknolojia Mandala, ba grau  lisensiatura no mestradu iha área siénsia informátika, saúde no  ekonomia.

Misaun ida-ne’e nu’udar parte hosi esforsu kontínuu atu hametin parseria entre Timor-Leste no Indonézia iha área ensinu superiór nian, hodi kontribui ba kualifikasaun rekursus umanus no ba dezenvolvimentu sientífiku no teknolójiku nasionál.