Sorumutu Estraordináriu Konsellu Ministrus loron 12 fulan-janeiru tinan 2026

Konsellu Ministrus hala’o sorumutu iha Palásiu Governu, Dili, no analiza aprezentasaun hosi Ministra Finansas, Santina José Rodrigues F. Viegas Cardoso, Prezidente Komisaun Funsaun Públika (CFP, sigla iha lian Portugés), Agostinho Letêncio de Deus no hosi grupu traballu ba reforma jestaun rekursus umanus Administrasaun Públika nian, kona-ba inisiativa revizaun ba rejime jurídiku kontratasaun termu sertu iha administrasaun públika.

*****

Konsellu Ministrus analiza dadus ne’ebé Ministériu Finansas aprezenta kona-ba prosesu regularizasaun ba pagamentu saláriu désimu terseiru tinan 2025 nian.

*****

Konsellu Ministrus aprova ona projetu Rezolusaun Governu nian, ne’ebé aprezenta hosi Ministra Solidariedade Sosiál no Inkluzaun, Verónica das Dores, kona-ba nomeasaun Zeferino da Costa Bobo ba kargu Prezidente Konsellu Administrasaun Institutu Nasionál Seguransa Sosiál, no mós nu’udar Prezidente Konsellu Fundu Rezerva Seguransa Sosiál nian.

Rezolusaun Governu ne’e nomeia mós Gemito do C. Amaral de Jesus ba kargu vogál Konsellu Administrasaun Institutu Nasionál Seguransa Sosiál nian, hodi troka Dulce Natividade da Cunha, ne’ebé rezigna-an tanba razaun saúde. REMATA