Deklarasaun Timor-Leste nian kona-ba situasaun iha Venezuela
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Dili, Loron 5 fulan-janeiru tinan 2026
Komunikadu Imprensa
Deklarasaun Timor-Leste nian kona-ba situasaun iha Venezuela
Timor-Leste akompaña ona relatóriu sira kona-ba intervensaun Estadus Unidus Amérika nian iha Repúblika Bolivariana Venezuela no detensaun no mós hasai ho forsa Prezidente Venezuela no nia feen, ne'ebé akontese iha loron 03 fulan-janeiru tinan 2026.
Timor-Leste hato’o nia preokupasaun kona-ba perturbasaun ba vida sivíl no bele iha impaktu umanitáriu tanba atividade militár estranjeiru sira.
Timor-Leste reafirma ninia kompromisu ba direitu internasionál, inklui respeitu ba soberania, atu labele uza ameasa ka uza forsa hasoru integridade territoriál ka independénsia polítika hosi kualkér Estadu, no mós rezolusaun pasífika ba disputa sira, ne’ebé konsagra ona iha Artigu 2.º iha Karta Nasoins Unidas nian, ne’ebé nia prinsípiu esensiál sira atu salvaguarda independénsia País hotu-hotu nian, liuliu País ki’ik sira.
Timor-Leste husu hotu-hotu atu mantein kalma, atu filafali ba diálogu no diplomasia, no mós rezolusaun pasífika ida ba situasaun, tuir lei internasionál no prinsípiu sira Karta Nasoins Unidas nian. REMATA
