Timor-Leste komemora Loron Eróis Nasionál iha loron 31 fulan-dezembru tinan 2025, ho marxa simbólika husi Palásiu Prezidensiál ba Estátua saudozu Prezidente Nicolau Lobato nian iha Dili, hodi fó omenajen ba eroi no martir sira Libertasaun Nasionál nian ne’ebé sakrifika sira-nia vida ba independénsia no soberania país nian. 

Komemorasaun ne’e, halibur Prezidente Repúblika, reprezentantes hosi órgaun soberania sira, membrus Governu Konstitusionál IX, veteranus, forsas defeza no seguransa nian, no mós funsionáriu públiku no sidadaun sira, iha momentu ida ne’ebé simboliza unidade nasionál no responsabilidade interjerasionál iha prezervasaun memória istórika no valór sira patriotizmu nian.

Marxa ne’e espesifikamente komemora aniversáriu ba da-47 Komandante Nicolau Lobato nia mate iha kombate, ne’ebé akontese iha loron 31 fulan-dezembru tinan 1978, iha suku Mindelo, iha munisípiu Manufahi, nune’e mós memória ba eroi sira hotu ne’ebé lakon sira-nia vida iha luta ba autodeterminasaun hosi tinan 1975 to’o 1999.

Momentu prinsipál hosi komemorasoins ne’e hala’o iha Monumentu Nicolau Lobato, iha ne’ebé Prezidente Repúblika, José Ramos-Horta, prezide serimónia solene hodi fó onra ba eroi nasionál sira, ho tau ai-funan.

Iha nia diskursu, Xefe Estadu fó omenajen ba aten-barani no abnegasaun hosi fundadór sira nasaun nian, hodi destaka figura istórika sira hanesan Nicolau dos Reis Lobato no Francisco Xavier do Amaral, no subliña katak liberdade Timór-Leste nian nu’udar rezultadu prosesu rezisténsia no sakrifísiu ne’ebé naruk hosi povu timoroan.

Programa ofisiál ba Loron Eróis Nasionál konklui iha kalan 31 fulan-dezembru ho selebrasaun ne’ebé marka tinan 2025 nia rohan no simu tinan 2026 iha Palásiu Prezidensiál Nicolau Lobato, ho partisipasaun hosi populasaun.