Timor-Leste sente triste ho Pat Walsh nia mate
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Loron 29 fulan-dezembru tinan 2025
Komunikadu Imprensa
Timor-Leste sente triste ho Pat Walsh nia mate
Governu Repúblika Demokrátika Timor-Leste hato’o laran triste kle’an kona-ba Pat Walsh nia mate, iha loron 29 fulan-dezembru tinan 2025, ativista direitus umanus australianu nian no belun kleur husi povu timoroan.
Durante dékadas balu nia laran, Pat Walsh mantein kompromisu metin ida ba kauza Timor-Leste nian, hodi hala’o papél importante ida iha defeza direitu ba autodeterminasaun, denunsia violasoins direitus umanus dezde inísiu okupasaun no apoiu prosesu rekonsiliasaun nasionál hafoin restaurasaun independénsia.
Nia destaka mós ba ninia kontribuisaun iha ámbitu Komisaun Akollimentu, Lia-loos no Rekonsiliasaun (CAVR, sigla iha portugés), no mós ba servisu ne’ebé dezenvolve hodi prezerva no promove legadu relatóriu Chega!, ne’ebé husik marka ida ne'ebé dura iha memória istórika no institusionál país nian.
Hodi rekoñese ninia perkursu no dedikasaun ba povu timoroan, Pat Walsh hetan kondekorasaun Insígnia Orden Timor-Leste husi Estadu Timór.
Ministru Prezidénsia Konsellu Ministrus no Portavós Governu nian, Agio Pereira, hodi Governu no Povu Timor-Leste nia naran, hato’o ninia “sentidas kondolénsias kle’an ba família, belun sira no ba sira hotu ne’ebé mak iha nia sorin durante nia moris tomak”. Nia mós realsa katak “sei hanoin nafatin Pat Walsh nia kontribuisaun ne’ebé iha folin boot tebe-tebes ba pás, justisa no dignidade povu Timor-Leste nian”. REMATA
