Sorumutu Konsellu Ministrus loron 22 fulan-dezembru tinan 2025

Konsellu Ministrus hala’o sorumutu iha Palásiu Governu, Dili, no aprova ona projetu Dekretu Governu nian, ne’ebé aprezenta hosi Ministra Finansas, Santina José Rodrigues F. Viegas Cardoso, ne’ebé aprova “Regulamentu ba aplikasaun Kódigu Aprovizionamentu no Kontratus Públikus” no “Vizaun jerál kona-ba enkuadramentu legál ba kontratasaun públika iha Timor-Leste”.

Dokumentu sira ne’ebé aprova tuir Dekretu Governu ida-ne’e elabora ho objetivu atu apoia funsionáriu públiku, jestór akizisaun no interveniente sira seluk iha prosesu kontratasaun públika, hodi fó ba sira orientasaun ida ne’ebé klaru kona-ba implementasaun enkuadramentu jurídiku foun ne’ebé estabelese hosi Dekretu-Lei n. 1/2025, loron 8 fulan-janeiru, ne’ebé aprova Kódigu Aprovizionamentu no Kontratus Públikus.

Regulamentu no Vizaun Jerál ne’e fó rezumu objetivu ida kona-ba dispozisoens prinsipais ne’ebé Kódigu foun introdús, hodi destaka ninia prinsípiu estruturante sira no fó detalle kona-ba métodu kontratasaun ne’ebé sei adota, hodi bele garante transparénsia, efisiénsia no preferénsia ba fornesedór nasionál sira iha selebrasaun kontratus públikus.

Dokumentu sira ne’e sei disponivel iha Portál Aprovizionamentu nian, iha lian ofisiál sira no ho tradusaun sira ba lian traballu nian, no aplika ba kontratus públikus akizisaun ka lokasaun (aluga) beins, akizisaun servisus ka ezekusaun obras nian, ho hanoin atu hatán ba nesesidades servisus no entidade sira nian iha Setór Públiku Administrativu.

Dekretu Governu ida-ne’e tama iha vigór, iha loron 1 fulan-janeiru tinan 2026.

*****

Konsellu Ministrus aprova ona projetu Dekretu Governu, ne’ebé aprezenta mós hosi Ministra Finansas, ne’ebé aprova Dokumentus Padraun Aprovizionamentu nian ne’ebé previstu iha Dekretu-Lei n. 1/2025, loron 8 fulan-janeiru, kona-ba kódigu Aprovizionamentu no Kontratus Públikus.

Dekretu Governu ida-ne’e aprova Dokumentus Padraun Aprovizionamentu nian, ne’ebé organiza iha kategoria tolu ne’ebé keta-ketak — Beins, Servisus no Obras— atu nune’e bele fasilita sira-nia aplikasaun tuir natureza hosi kontratu públiku ne’e.

Formuláriu sira ne’ebé presiza ba ezekusaun prosedimentus aprovizionamentu nian sei disponibiliza hosi Ministériu Finansas iha Portál Aprovizionamentu. Servisus no entidades  Setór Públiku Administrativu nian tenke rai sistema rejistu prosedimentus aprovizionamentu nian iha arkivu ba períodu mínimu tinan 10 hahú hosi data rejistu nian.

Dekretu Governu ida-ne’e tama iha vigór, iha loron 1 fulan-janeiru tinan 2026.

*****

Ikusliu, Konsellu Ministrus analiza aprezentasaun hosi Ministru Petróleu no Rekursus Minerais, Francisco da Costa Monteiro, no Komisaun Nasionál Aprovizionamentu, kona-ba prosesu pós-kualifikasaun hosi empreza konkorrente sira ba projetu Baze Lojístika Suai no Auto-estrada Kosta Súl nian, ne’ebé hala’o entre fulan-novembru no fulan-dezembru tinan 2025. Aprezentasaun foka liu ba avaliasaun téknika, finanseira no kapasidade hosi empreza sira ne’ebé maka selesiona ona, no mós diskusaun sira ne’ebé maka hala’o ho instituisaun bankáriu no proponente sira kona-ba modelus finansiamentu nian. Hafoin análize ida-ne’e, Konsellu Ministrus konkorda ho rekomendasaun sira ne’ebé aprezenta ona, hodi konkorda kona-ba definisaun ba pasu sira tuirmai, ne’ebé inklui posibilidade kriasaun komisaun interministeriál nian ida atu hala’o negosiasaun finansiamentu no preparasaun kuadru legál espesífiku ida ba dezenvolvimentu projetu estratéjiku sira-ne’e, hodi bele garante klareza jurídika, koordenasaun institusionál no protesaun ba intereses Estadu nian. REMATA