Iha loron 16 fulan-dezembru tinan 2025, Xefe Estadu  no Xefe Governu sira hosi Komunidade País Lian Portugés (CPLP , sigla iha lian portugés) deside,  hodi suspende partisipasaun Repúblika Giné-Bissau nian iha atividades hotu-hotu  hosi organizasaun to’o restaura orden konstitusionál, no mós hili Repúblika Demokrátika Timor-Leste temporariamente hodi kaer prezidénsia pro tempore CPLP nian. 

Desizoins ne’e foti durante Konferénsia Estraordinária Dahuluk hosi Xefe Estadu no Governu sira CPLP nian, ne’ebé hala’o liuhosi videokonferénsia. Konferénsia ne’e hala’o hodi analiza situasaun polítika no institusionál iha Giné-Bissau hafoin golpe Estadu ne’ebé akontese iha loron 26 fulan-novembru tinan 2025.

Iha Deklarasaun Finál, Estadus-membrus hato’o preokupasaun maka’as kona-ba interrupsaun prosesu eleitorál iha Giné-Bissau, kondena violasaun ba prinsípius demokrátikus no husu atu restabelese kedas orden konstitusionál no rekonsiliasaun nasionál.

Iha kontestu hanesan, aprova ona Rezolusaun ida-ne’ebé determina suspensaun totál hosi partisipasaun Giné-Bissau nian iha atividades CPLP, tuir artigu 7.º hosi Estatutus organizasaun nian, no transferénsia prezidénsia pro tempore ba Timor-Leste, ho prerrogativa inerente sira  hotu.

Konferénsia ne’e hetan partisipasaun husi Xefe Estadu no Governu sira, ka sira-nia reprezentantes, husi Angola, Brazil, Cabo Verde, Giné Ekuatoriál, Mosambike, Portugál, São Tomé no Prínsipe, no mós Timor-Leste.