Vise-Primeiru-Ministru no Ministru Koordenadór Asuntus Ekonómikus, Ministru Turizmu no Ambiente, Francisco Kalbuadi Lay, partisipa iha loron 10 fulan-dezembru tinan 2025 nu’udar oradór prinsipál iha ASEAN Marketing Summit 2025, ne’ebé hala’o iha Jakarta, Indonézia, hanesan parte ida hosi MarkPlus Conference, ne’ebé organiza hosi MarkPlus, Inc. 

Summit Marketing ASEAN nian hanesan parte ida husi Konferénsia MarkPlus, konferénsia rejionál anuál ida ne’ebé halibur responsaveis governamentais, lider emprezariál sira no peritu sira hodi diskute kona-ba tendénsias ekonómikas, marketing, inovasaun no transformasaun dijitál iha rejiaun ASEAN. 

Iha nia intervensaun, Vise-Primeiru-Ministru subliña katak, hanesan membru foun ASEAN nian, “momentu ida-ne’e iha signifikadu ida ne’ebé espesiál tebes”, tanba reflete ” kompromisu, esperansa no prontidaun Timor-Leste nian ba servisu hamutuk ho ema hotu-hotu iha konstrusaun ba rejiaun ida ne’ebé forte no prósperu liu”. 

Francisco Kalbuadi Lay hatete liután katak ASEAN Marketing Summit “la’ós de’it enkontru tékniku ida”, maibé “plataforma ida iha ne’ebé lider, espesialista no parseiru sira hosi rejiaun tomak halibur hamutuk hodi define oinsá ita projeta imajen rejionál ba investidór, emprezáriu no turista sira”, hodi hatutan katak forum ne’e permite “fahe ideia sira kona-ba oinsá atu hametin ASEAN nia kompetitividade no unidade iha mundu global ida ne’ebé nafatin iha mudansa ho lalais”. 

Vise-Primeiru-Ministru destaka mós katak adezaun ba ASEAN “la’ós de’it kona-ba kumprimentu rekizitu tékniku sira”, maibé reprezenta “liga ita-nia povu no ita-nia futuru ho família rejionál ida ne’ebé luan liu”, ho subliña katak integrasaun ekonómika sei permite ba empreza timoroan sira integra iha kadeia valór rejionál no atrai investimentu.

Eventu ne’e foka liu ba tópiku sira hanesan transformasaun dijitál, intelijénsia artifisiál, komportamentu konsumidór no estratéjia sira atu hametin kompetitividade ekonómika iha Sudeste Aziátiku.