Iha loron 1 to’o 2 fulan-dezembru tinan 2025, Ministru Justisa, Sérgio de Jesus Fernandes da Costa Hornai partisipa iha Kongresu Internasionál Ministrus Justisa nian ba da-15 iha Roma, Itália. Sorumutu ne’e halibur reprezentante governamentál, dirijente judisiál no organizasaun internasionál sira hodi ko’alia kona-ba polítika justisa no halakon pena de morte.  

Kongresu ne’ebé promove husi Komunidade Sant’Egidio ho lema “Laiha moris lahó justisa”, ne’e fó fatin atu fahe esperiénsia no reafirma kompromisu internasionál ba sistema justisa ne’ebé umanu, hodi aliña ho prinsípiu sira direitus umanus nian.

Durante sesaun plenária, Ministru Sérgio Hornai reafirma katak Timor-Leste la aplika pena de morte no mós pena perpétua, bazeia ba Konstituisaun no Kódigu Penál Timor-Leste nian, hodi reafirma pozisaun nasionál hasoru aplikasaun pena kapitál (pena de morte). Nia hateten mós katak ezisténsia mekanizmus kleménsia, hanesan komutasaun no indultu, ne’ebé Prezidente Repúblika fó, ho objetivu atu promove reinsersaun sosiál.

Sérgio Hornai rekorda mós katak Timor-Leste, ne’ebé “foin lalais ne’e sai nu’udar Estadu-Membru ASEAN ba da-11”, “iha kompromisu atu promove halakon pena de morte iha nivel rejionál”. Ministru salienta katak Timor-Leste sei kontinua enkoraja diálogu no kooperasaun ho País sira seluk, ho hanoin atu halakon prátika ida-ne’e no konsolida sistema justisa sira ne’ebé salvaguarda direitu ba moris no dignidade ema umana nian.