Ministru Planeamentu no Investimentu Estratéjiku, Gastão Fernando de Sousa, hala’o vizita ofisiál ida ba Sekretariadu Permanente Forum ba Kooperasaun Ekonómika no Komersiál entre Xina no País Lian Portugés (Forum Makau), iha loron 28 fulan-novembru tinan 2025, okaziaun ne’ebé koinside ho aniversáriu Proklamasaun Independénsia Timor-Leste ba dala 50. Objetivu hosi viajen ne’e mak atu hametin kooperasaun iha ámbitu mekanizmu multilaterál Forum Makau nian no promove ambiente negósius no oportunidades investimentu iha Timor-Leste. 
Durante sorumutu ho Sekretariadu Permanente, diskute kona-ba inisiativas atu hametin kooperasaun entre Timor-Leste, Makau no Interior Xina nian, hodi aproveita liután vantajens hosi Plataforma Sino-Luzófona Makau nian. Partisipa iha sorumutu ne’e Sekretáriu-Jerál Forum Makau, Ji Xianzheng ,Sekretárius-Jerais Adjuntus Xie Ying no António Lei, Koordenadora Gabinete Administrasaun, Li Xiaohui, Delegadu Timor-Leste ba Forum Makau, António Ramos da Silva, no membrus Sekretariadu sira seluk.
Iha loron ne’ebé hanesan, hala’o “Palestra kona-ba Ambiente Negosius no Promosaun Investimentu iha Timor-Leste”, iha Kompleksu Plataforma Servisus ba Kooperasaun Komersiál entre Xina no País Lian Portugés, ne’ebé organiza husi Sekretariadu Permanente Forum Makau nian. Sesaun ne’e inklui aprezentasaun vídeo institusionál ida kona-ba oportunidades investimentu iha nasaun ne’e, intervensaun temátika ida husi Ministru Gastão Fernando de Sousa no interasaun direta ho partisipante sira liuhusi sesaun perguntas no respostas.
Eventu ne’e hetan partisipasaun husi Sekretáriu-Jerál Forum Makau nian, Ji Xianzheng, reprezentantes husi Asosiasaun Amizade Makau-Timor no konvidadu sira seluk. Marka prezensa mós asosiasoins emprezariais hosi Makau, emprezas hosi interior Xina no Makau, no mós membrus hosi Sekretariadu Permanente.
Palestra ne’e permite atu hakle’an koñesimentu kona-ba Timor-Leste nia ambiente emprezariál no ajuda identifika oportunidades foun ba kooperasaun ekonómika. Inisiativa ne’e mós reforsa papél Plataforma Sino-Luzófona Makau nian iha promosaun investimentu no estímulu ba interkámbiu entre Timor-Leste, Makau no Interiór Xina nian.