Governu Timor-Leste hato’o solidariedade ba país aziátiku sira ne’ebé afetadu husi inundasaun
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Dili, loron 2 fulan-dezembru tinan 2025
Komunikadu Imprensa
Governu Timor-Leste hato’o solidariedade ba país aziátiku sira ne’ebé afetadu husi inundasaun
Governu Repúblika Demokrátika Timor-Leste espresa nia solidariedade kle’an ba povu no Governu Indonézia, Sri Lanka, Tailándia no Malázia, no mós nasaun sudeste aziátiku sira seluk ne’ebé afetadu husi inundasaun no rai-halai, iha loron hirak ikus ne’e, halo ema liu rihun ida mate, ema atus ba atus lakon no ema rihun atus ba atus dezlokadu.
Inundasaun no rai-halai ne'ebé afeta Sudeste Aziátiku sai hanesan epizódiu ida ne’ebé aat liu iha tinan hirak ikus ne'e. Operasaun salvamentu no tulun nian kontinua iha rejiaun oioin, enkuantu nafatin buka ema sira ne'ebé lakon. Indonézia, liuliu illa Sumatra, rejista númeru aas liu hosi vítima sira, ho mate no lakon atus ba atus, infraestrutura sira ne'ebé rahun no komunidade sira ne'ebé izoladu. Iha Sri Lanka, Tailándia no Malázia, autoridade sira deklara ona estadu emerjénsia iha área oioin, iha ne'ebé ema milloins hetan prejuízu makaas, rihun ba rihun iha abrigu temporáriu sira no susar atu hetan asesu ba servisu esensiál sira, edukasaun no meius subsisténsia.
Primeiru-Ministru, Kay Rala Xanana Gusmão, “hodi Governu no povu Timor-Leste nia naran”, hato’o nia “tristeza no solidariedade kle’an ba povu Indonézia, Malázia, Sri Lanka no Tailándia, ne’ebé terus tanba impaktu husi tempestade tropikál estremu foin lalais ne’ebé hamosu inundasaun no rai-halai maka’as tebes”.
Xefe Governu ne’e mós hateten katak “lakon moris no deslokasaun ema, trájiku no triste teb-tebes. Ami laran taridu tebes ho eskala trajédia ida-ne’e no senáriu sira kona-ba inundasaun no deslokasaun ema, ne’ebé hamosu preokupasaun boot iha Timor-Leste”.
Portavós Governu no Ministru Prezidénsia Konsellu Ministrus, Agio Pereira, afirma katak “iha tempu susar ida-ne’e, ami-nia hanoin hamutuk ho vítima no sira-nia família no ami rekoñese sira hotu ne’ebé komprometidu atu kontinua tulun komunidade sira ne'ebé afetada”.
Governu Timor-Leste reafirma ninia konfiansa “katak ho forsa no reziliénsia husi sira-nia povu, nasaun afeitadu hirak ne'e sei rekupera no harii filafali. Timor-Leste hamriik iha solidariedade ho ita-nia bin-alin no maun-alin sira iha rejiaun aziátiku iha tempu susar no rekuperasaun ida-ne’e nia laran”. REMATA
