Era foun ida kooperasaun nian mosu daudaun ba Greater Sunrise
Ministériu Petróleu no Rekursus Minerais Timor-Leste no Woodside Energy
Governu Konstitusionál IX
KOMUNIKADU IMPRENSA KONJUNTU
Loron 25 fulan-novembru tinan 2025
Era foun kooperasaun ba Greater Sunrise
Ministériu Petróleu no Rekursus Minerais Timor-Leste (MPRM) no Woodside Energy Ltd (Woodside) kontente hodi fó sai asinatura Akordu Kooperasaun (Akordu) hodi realiza estudus no atividades ho objetivu atu dezenvolve konseitu GNL ida ne’ebé bazeadu iha Timor (TLNG).
Akordu ne’e hanesan marku signifikativu ida ba Timor-Leste no Woodside nia esforsu iha tempu naruk atu esplora valór kampu gás Greater Sunrise nian no hatudu espíritu kolaborasaun ne’ebé renovadu no kompromisu ho boa-fé entre parte rua.
Tuir Akordu ne’e, MPRM no Woodside sei halo atividade konsolidasaun komersiál no téknika ba projetu foun ida iha Timor-Leste, ho kapasidade besik tonelada millaun 5 GNL kada tinan, inklui fábrika gás ba uzu doméstiku no fábrika estrasaun éliu nian. Atividade hirak ne’e sei hala’o ho paralelu ho negosiasaun ne’ebé la’o hela kona-ba kuadru fiskál, regulatóriu no legál hodi fó apoiu ba dezenvolvimentu montante kampu Greater Sunrise entre konsórsiu Sunrise ho governu Timor-Leste no Austrália.
Akordu ne’e inklui planu altu nivel ida ne’ebé deskreve atividade prinsipál sira ne’ebé presiza atu dezenvolve no avansa oportunidade ida ne’e, tuir planu refere, produsaun GNL dahuluk bele hahú iha tinan 2032-2035, depende ba definisaun konseitu no desizaun investimentu.
Ministru Petróleu no Rekursus Minerais Timor-Leste, Sua Exelénsia Francisco da Costa Monteiro, afirma katak Akordu ne’e transmite mensajen ida ne’ebé klaru katak Governu Timor-Leste no Woodside hamutuk iha sira-nia ambisaun atu lori Greater Sunrise tama iha faze produsaun ho dalan ida ne’ebé fó benefísiu ba parte interesada sira hotu.
"Projetu TLNG ne’e lori benefísiu ekonómiku, sosiál no estratéjiku ne’ebé di’ak-liu ba povu Timor-Leste, no ita iha kompromisu atu serbisu ho dalan konstrutivu ho Woodside, konsórsiu Greater Sunrise no parte interesada sira seluk hodi lori projetu ne’e ba oin no halo ita-nia vizaun ba Greater Sunrise sai realidade."
CEO Woodside nian, Meg O'Neill, simu ho laran-haksolok akordu ne'e, hodi afirma katak ida-ne'e reflete pasu tuirmai iha relasaun no kompromisu komún hodi dezenvolve kampu Greater Sunrise.
"Obra ida-ne'e nu’udar estensaun ida hosi estudu konsetuál tinan kotuk nian no sei analiza konsiderasaun sira seluk ne'ebé nesesáriu atu to'o iha definisaun hosi konseitu ne’e, hanesan hetan akordu ida kona-ba estrutura komersiál juzante ne'ebé adekuadu liu hodi atrai finansiamentu no komprende trajetu preferensiál ba gazodutu esportasaun gás nian." REMATA
