Iha loron 28 fulan-Novembru, Timor-Leste komemora Tinan 50 Proklamasaun Independénsia. Iha tinan 1975, hafoin liu sékulu haat ukun koloniál nian, testu Proklamasaun Unilaterál Independénsia Timor-Leste ne’ebé lee hosi Prezidente Repúblika dahuluk, Francisco Xavier do Amaral.

Selebrasaun Aniversáriu Proklamasaun Independénsia nian ba dala 50 sei hala’o iha munisípiu hotu-hotu, iha Rejiaun Administrativa Espesiál Oekusi Ambenu (RAEOA) no iha Ataúro, ho objetivu atu promove valór dame, solidariedade no demokrasia nian, no mós garante selebrasaun ida ho karater nasionál, partisipativa no besik ba populasaun.

Primeiru-Ministru Kay Rala Xanana Gusmão, liuhosi Dekretu n. 023/PM/XI/2025, loron 7 fulan-novembru tinan 2025, dezigna membru Governu sira ne’ebé responsavel hodi reprezenta Ezekutivu iha serimónia ofisiál sira komemorasaun Tinan 50 Proklamasaun Independénsia nian, ne’ebé sei hala’o iha territóriu nasionál tomak.

Iha Dili, serimónia prinsipál sei hala’o iha Palásiu Governu, ho prezensa hosi Vise-Primeiru-Ministru sira, Ministru Prezidénsia Konsellu Ministrus, Ministra Finansas, Ministru Negósius Estranjeiru no Kooperasaun, Ministru Administrasaun Estatál, Ministru Defeza no Ministru Interiór, nune’e mós Vise-Ministra Finansas, Vise-Ministra ba Asuntus ASEAN no Vise Ministru Administrasaun Estatál, no mós Sekretária Estadu Igualdade, Sekretáriu Estadu Komunikasaun Sosiál, Sekretáriu Estadu Arte no Kultura, Sekretáriu Estadu Dezenvolvimentu Rurál, Sekretáriu Estadu Asuntus Toponímia no Organizasaun Urbana, no mós Sekretáriu Estadu Protesaun Sivíl.

Iha munisípiu no rejiaun sira-seluk, Governu sei reprezenta hosi Ministru, Vise-Ministru no Sekretáriu Estadu sira, tuir distribuisaun tuirmai:

• Aileu – Ministra Saúde, Vise-Ministru ba Fortalesimentu Institusionál Saúde no Vise Ministru ba Operasionalizasaun Ospitais, no mós Sekretáriu Estadu Formasaun Profisionál no Empregu;

• Ainaru – Ministru Asuntus Kombatentes Libertasaun Nasionál no Sekretáriu Estadu Veteranus;
• Ataúro – Vise-Ministru Asuntus Parlamentares;
• Baucau – Ministra Edukasaun no Sekretáriu Estadu Ensinu Sekundáriu Jerál no Ensinu Sekundáriu Tékniku-Vokasionál;

• Bobonaru – Ministru Justisa, Vise-Ministru ba Fortalesimentu Institusionál, no Sekretáriu Estadu Terras no Propriedades;
• Kovalima – Ministru Komérsiu no Indústria no Vise-Ministru Komérsiu;
• Dili – Ministra Solidariedade Sosiál no Inkluzaun no Vise-Ministra Solidariedade Sosiál no Inkluzaun;

• Ermera – Ministru Transportes no Komunikasoins;
• Lautein – Ministru Petróleu no Rekursus Minerais no Sekretáriu Estadu Kooperativas;

• Likisá – Ministru Ensinu Superiór, Siénsia no Kultura;
• Manatutu – Ministru Planeamentu no Investimentu Estratéjiku;

• Manufahi – Ministru Juventude, Desportu, Arte no Kultura;

• Oekusi Ambenu – Ministru Obras Públikas, Vise-Ministru ba Infraestruturas, no Sekretáriu Estadu Eletrisidade, Bee no Saneamentu;
• Vikeke – Ministru Agrikultura, Pekuária, Peska no Florestas, no mós Sekretáriu Estadu Peskas, Sekretáriu Estadu Pekuária no Sekretáriu Estadu Florestas.

Despaxu ne’e mós fó instrusaun ba membru dezignadu hotu-hotu, no mós sira ida-idak nia dirijentes administrasaun públika, atu partisipa ativamente iha atividades preparasaun no asaun públika ne’ebé iha relasaun ho serimónia sira ne’e, inklui abertura ba feira no espozisaun, no mós atu kolabora ho Komisaun Organizadora Serimónia Ofisiál Komemorativa ba Tinan 50 Proklamasaun Independénsia nian iha mobilizasaun populasaun ba partisipasaun ne’ebé boot iha Timor-Leste laran tomak