Ministériu Negósius Estranjeirus no Kooperasaun, liuhosi Vise-Ministra Asuntus ASEAN, Milena Rangel, prezide serimónia abertura Workshop Pós-Adezaun kona-ba Komprensaun no Implementasaun Kompromisu Timor-Leste nian ba Komunidade Ekonómika ASEAN (AEC), ne’ebé hala’o iha loron 4 fulan-novembru tinan 2025, iha Dili, ho tema “Hafoin Adezaun – Harii Timor-Leste nia Roteiru Nasionál ba Implementasaun Komunidade Ekonómika ASEAN 2026–2030”. 

Iha nia diskursu, Vise-Ministra Milena Rangel subliña katak Timor-Leste nia adezaun plena ba ASEAN “marka inísiu hosi kapítulu foun ida ba nasaun — hosi adezaun ba implementasaun”, hodi destaka importánsia hosi esforsu hamutuk ida ne’ebé orienta hosi abordajen integradu ida iha Governu tomak no sosiedade, liuhosi reforma sira ne’ebé tuir sekuénsia, no mós parserias no solidariedade.

Workshop durante loron tolu ne’e organiza husi Ministériu Negósius Estranjeirus no Kooperasaun iha parseria ho Embaixada Austrália, Banku Aziátiku Dezenvolvimentu (ADB), Sekretariadu ASEAN, Uniaun Europeia no Institutu Investigasaun Ekonómika ba ASEAN no Ázia Orientál (ERIA). Objetivu hosi workshop ne’e atu apoia Timor-Leste nia tranzisaun hosi faze adezaun ba implementasaun plena kompromisus Komunidade Ekonómika ASEAN (AEC) nian.

Eventu ne’e halibur peritu sira husi Estadus-Membrus ASEAN, inklui Kamboja, Repúblika Demokrátika Populár Laos no Vietname, no mós reprezentantes husi instituisaun governu Timor-Leste nian, setór privadu, akademia, juventude no sosiedade sivíl, hodi fahe esperiénsia no identifika prioridade sira iha dezenvolvimentu Roteiru Nasionál ba Implementasaun AEC 2026–2030.

Vise-Ministra, tuir tema Prezidénsia Filipinas ba ASEAN iha 2026 — “La’o hamutuk ba ita-nia futuru, (Navigating our future, together)” —enkoraja partisipante hotu-hotu atu reafirma sira-nia kompromisu koletivu hodi serbisu hamutuk, hametin reziliénsia, prosperidade no solidariedade Timor-Leste no família ASEAN nian.