……………………………………………………………………………………………………………..
Komunikadu Imprensa
Dili,30 fulan-outubru tinan 2025
INSS lansa Portál foun ba Entidades Empregadoras — Deklarasoins Saláriu nian, ba oin tenke entrega online de’it hahú iha loron 1 fulan-janeiru tinan 2026
Institutu Nasionál Seguransa Sosiál (INSS) lansa ona portál foun ida ne’ebé asesivel ba públiku, ne’ebé fasilita relasaun entre entidades empregadoras ho Seguransa Sosiál no moderniza servisus ne’ebé fornese.
Portal ne’e permite entidades empregadoras atu ho fasil no seguru, rejista no submete online deklarasaun saláriu, inskreve funsionáriu foun sira, relata terminasaun kontratu, emite diretamente guia pagamentu no submete provas pagamentu nian ne’ebé korresponde.
INSS informa katak, hahú loron 1 fulan-janeiru tinan 2026, sei simu de’it Deklarasaun Remunerasaun sira ne’ebé entrega liuhosi Portál foun.
Kona-ba ida-ne’e, INSS husu atu entidades empregadoras hotu-hotu — inklui empreza, asosiasaun, entidade no servisu públiku sira — kontakta INSS ba akreditasaun iha Portál foun to’o loron 30 fulan-novembru tinan 2025. Akreditasaun maka kondisaun nesesáriu ida atu utiliza funsionalidades ne’ebé disponivel no atu entrega deklarasaun sira tuir prazu legál ne’ebé hatuur ona.
Informa liután katak INSS, atu apoia iha prosesu ida-ne’e, hala’o sesaun esklaresimentu no formasaun kona-ba Portál foun, kada segunda-feira hahú tuku 9 dadeer.
Atu hetan liután informasaun no esklaresimentu ba dúvida sira, bele kontaktu INSS, iha servisu atendimentu ka liuhosi:
Email: segurança.socialtl@gmail.com ou info@segurancasocial.gov.tl
Telefone: +670 7839 7378