Ministru Prezidénsia Konsellu Ministrus, Agio Pereira, hasoru malu ohin, loron 30 fulan-outubru tinan 2025, iha Palásiu Governu, ho Embaixadór foun Portugál nian ba Timor-Leste, Duarte Bué Alves, akompaña hosi Vise-Xefe Misaun Embaixada Portugál nian, Rui Guilherme Araújo. Ida-ne’e hanesan enkontru ofisiál dahuluk entre ministru ho diplomata portugés dezde aprezentasaun karta kredensiál ba Prezidente Repúblika iha fulan-setembru liubá.  

Durante enkontru ne’e, Embaixadór Duarte Bué Alves reafirma kompromisu forte Portugal nian atu kontinua fó apoiu ba Timor-Leste, hodi destaka área edukasaun no kapasitasaun rekursus umanus nu’udar pilár sentrál ba kooperasaun bilaterál. Nia subliña katak Programa Estratéjiku Kooperasaun (PEC, akrónimu iha portugés) iha tinan 2024–2028, ho valór totál euro millaun 75 (besik dolar amerikanu millaun 87), nu’udar instrumentu prinsipál parseria nian entre nasaun rua ne’e.

Ministru Agio Pereira haktuir hikas katak formasaun no kapasitasaun rekursus umanus nu’udar prioridade prinsipál ida hosi Governu Konstitusionál IX, hodi konsidera katak reforsu kompeténsias nasionais importante tebetebes ba dezenvolvimentu sustentável nasaun nian.

Diplomata refere mós katak 81% hosi orsamentu tinan dahuluk nian ba PEC ne’ebé aloka  tiha ona ba setór edukasaun no formasaun nian, no defende importánsia hosi kooperasaun bazeia ba prosimidade no serbisu hamutuk, hodi subliña katak Portugal tenke kontinua  serbisu “ho Timor-Leste” no la’ós de’it “iha Timor-Leste”.

Ministru espresa rekoñesimentu ba Portugál nia apoiu iha tinan hirak nia laran no hato’o disponibilidade tomak atu kontinua hametin kooperasaun bilaterál.