Ministru Prezidénsia Konsellu Ministrus, Agio Pereira, hasoru malu iha loron 28 fulan-outubru tinan 2025, iha Palásiu Governu, ho Embaixadór Uniaun Europeia iha Timor-Leste, Thorsten Bargfrede, hodi ko’alia kona-ba hametin kooperasaun bilaterál no posibilidade apoiu europeu nian ba implementasaun projetu “Portál Jornál Repúblika Dijitál”, inisiativa ida husi Imprensa Nasionál Timor-Leste (INTL, I.P.) ho objetivu atu promove transparénsia, seguransa jurídika no modernizasaun administrativa Estadu nian. 
Marka prezensa mós iha sorumutu ne’e maka Prezidente Imprensa Nasionál Timor-Leste, Jaime Correia no ninia Vise-Prezidente, Pedro Sarmento. Sorumutu ne’e hanesan sorumutu formál dahuluk entre governante no diplomata ne’e dezde aprezentasaun karta kredensiál Embaixadór Bargfrede nian ba Prezidente Repúblika, José Ramos-Horta, iha fulan-setembru tinan ida-ne’e.
Iha sorumutu ne’e, sira ko’alia kona-ba área kooperasaun oioin entre Timor-Leste no Uniaun Europeia, liu-liu iha área nutrisaun, saúde, edukasaun, infraestruturas, ekonomia, seguransa, dijitalizasaun, mudansas klimátikas, direitus umanus no prosesu eleitorál, nune’e mós implementasaun Akordu Samoa nian, ne’ebé asina iha fulan-novembru tinan 2023, ne’ebé estabelese kuadru jurídiku no estratéjiku kona-ba relasoins entre Uniaun Europeia no Estadus Áfrika, Karaíbas no Pasífiku nian ba tinan ruanulu oinmai.
Projetu Portál Jornál Repúblika Dijitál daudaun ne’e dezenvolve hosi Imprensa Nasionál Timor-Leste no iha tempu besik tenke inklui parseria ida ne’ebé sei formaliza ho Imprensa Nasionál – Casa da Moeda (INCM) Portugal nian. Projetu ne’e prevee kriasaun plataforma eletrónika ida ne’ebé sei permite asesu gratuitu, universál no permanente ba lejizlasaun tomak ne’ebé publika ona dezde tinan 2002, hodi reforsa transparénsia governamentál no Estadu direitu demokrátiku.
Proposta ne’ebé hato’o ba Uniaun Europeia subliña importánsia hosi inisiativa ida-ne’e iha ámbitu modernizasaun administrativa no promosaun governasaun di’ak, tuir prioridade sira ne’ebé define ona hosi Governu Konstitusionál IX. Projetu ne’e inklui dijitalizasaun ba arkivu lejizlativu, kriasaun ba motor peskiza ida ne’ebé avansadu, alojamentu seguru iha cloud, no formasaun téknika ba ekipa nasionál.