Ministru Prezidénsia Konsellu Ministrus, Agio Pereira, hala’o sorumutu ohin, loron 23 fulan-outubru tinan 2025 iha Palásiu Governu, ho Diretór Nasionál Santos iha Timor-Leste, Jose Lobato, hodi analiza kona-ba situasaun  atuál operasaun empreza nian iha nasaun ne’e, no diskute kona-ba planu investimentu iha futuru, hafoin enserramentu produsaun iha kampu Bayu-Undan, ne’ebé hala’o ofisialmente iha fulan-juñu iha tinan ida-ne’e. 

Durante sorumutu ne’e, Santos aprezenta informasaun atualizada kona-ba prosesu hapara atividade produsaun no progresu estudus ne’ebé la’o hela kona-ba viabilidade konversaun kampu Bayu-Undan nian, ba objetivus kaptura no armazenamentu karbonu (CCS) – inisiativa ida-ne’ebé bele pozisiona Timor-Leste nu’udar sentru rejionál ida iha área tranzisaun enerjétika ne’ebé dezenvolve hela.

Sorumutu ne’e nu’udar parte ida hosi esforsus Governu nian atu asegura tranzisaun ida ne’ebé ordenada hafoin enserramentu hosi operasoins iha Bayu-Undan, no garante katak, infraestruturas ne’ebé eziste bele valoriza liuhusi investimentu foun no solusaun teknolójika sira ne’ebé  aliña ho objetivus nasionais ba dezenvolvimentu sustentável no diversifikasaun ekonómika.