Governu Timor-Leste Hato'o Parabéns ba Primeira-Ministra Foun Japaun nian, Sanae Takaichi
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Loron 23 fulan-outubru tinan 2025
Komunikadu Imprensa
Governu Timor-Leste Hato'o Parabéns ba Primeira-Ministra Foun Japaun nian, Sanae Takaichi
Governu Repúblika Demokrátika Timor-Leste hato’o parabéns ba Sanae Takaichi ba ninia nomeasaun no tomada-de-pose nu’udar Primeira-Ministra Japaun nian, iha loron 21 fulan-outubru tinan 2025 liubá, sai nu’udar feto dahuluk iha istória japoneza ne’ebé kaer kargu ida-ne’e.
Iha karta ofisiál ne’ebé dirije ba nia omóloga japoneza, Primeiru-Ministru Kay Rala Xanana Gusmão, hodi Governu no povu Timor-Leste nia naran, ho laran tomak, hato’o “parabéns” ba nomeasaun ne’e, hodi subliña katak “ita-boot nia lideransa nu’udar Primeira-Ministra feto dahuluk Japaun nian, reprezenta marku istóriku ida no reflete forsa demokrasia Japaun nian ne’ebé kontínua no mós konfiansa hosi povu japonés ba ita-boot nia vizaun no servisu".
Xefe Governu destaka mós Japaun nia knaar nu’udar ida husi Timor-Leste nia “parseiru prinsipál ba dezenvolvimentu”, hodi hateten katak “Japaun kontribui maka’as ba esforsus harii pás no harii Estadu dezde independénsia, no nia amizade apoia ona Timor-Leste ne’ebé mosu hanesan demokrasia pasífika ida ho sosiedade ida ne’ebé nakloke, ekonomia ida ne’ebé iha hela kreximentu no respeitu ne’ebé kle’an ba lei internasionál”.
Primeiru-Ministru espresa nia vontade atu "serbisu besik" ho Governu Japaun ne’ebé foun "hodi aprofunda kooperasaun no avansa kompromisu hamutuk ba dame, prosperidade no dezenvolvimentu sustentável".
Ministru Prezidénsia Konsellu Ministrus no Portavós Governu nian, Agio Pereira, destaka katak "relasoins entre Timor-Leste ho Japaun bazeia ba amizade ida ne'ebé sólida no iha kompromisu mútuu ida ba pás no dezenvolvimentu. Governu Timor-Leste iha konfiansa katak, ho lideransa hosi Primeira-Ministra Sanae Takaichi, Japaun sei kontinua hala'o knaar importante ida hodi promove estabilidade no kreximentu ne'ebé sustentável iha rejiaun Indo-Pasífiku, no mós hametin kooperasaun bilaterál". REMATA
