Edisaun ba da-15 hosi programa “Página do Governo” sei hetan partisipasaun hosi Ministru Interiór, Francisco da Costa Guterres, no sei transmite iha sesta-feira, loron 24 fulan-outubru tinan 2025, tuku 8:00 kalan, iha Rádiu no Televizaun Timor-Leste (RTTL) no iha plataforma dijitál sira. Iha entrevista ida-ne’e, governante ne’e aprezenta prioridade no estratéjia prinsipál sira Governu nian iha área seguransa interna, jestaun fronteira, protesaun sivíl no modernizasaun ba forsa seguransa.

Durante konversa, Mini

stru destaka katak vizaun estratéj

ika iha setór seguransa to’o tinan 2030 ho objetivu atu garante sosiedade ida ne’ebé hakmatek no estavel, kondisaun esensiál ba dezenvolvimentu ekonómiku no sosiál país nian

. Nia subliña katak hametin seguransa públika nu’udar prioridade sentrál ida iha Ministériu Interiór, ne’ebé servisu atu reforsa kapasidade operasionál Polísia Nasionál Timor Lorosa’e (PNTL) no Autoridade Protesaun Sivíl nian, nune’e mós atu garante koezaun sosiál no respeitu ba direitus umanus.

Entre prioridade sira Governu nian, Ministru destaka fortalesimentu seguransa públika, profesionaliza no moderniza forsa seguransa sira, hadi’a infraestrutura polísia nian no reforsa polisiamentu komunitáriu hodi hakbesik forsas ba populasaun. “Seguransa nu’udar ita hotu nia responsabilidade. Ita-hotu kontribui hodi hametin seguransa iha ita-nia área”, “ho forma ida-ne’e ita reforsa koezaun nasionál, ita reforsa estabilidade nasionál no ita reforsa saida mak ita hanaran seguransa nasionál, ne’ebé ita hotu hakarak, atu nune’e dezenvolvimentu bele la’o nafatin”.

Ministru explika liután katak Governu investe hela iha modernizasaun teknolójika, ho énfaze atu introdús sistema MIDAS, ne’ebé permite kontrolu ida ne’ebé efikás liután kona-ba entrada no saída iha fronteira, no atu reforsa sistemas rekolla no análize informasaun nian ne’ebé fundamentál ba prevensaun krime no protesaun soberania nasionál.

Iha ámbitu Protesaun Sivíl, governante ne’e hatete katak foku maka redusaun riskus dezastre nian no prevensaun,  liuhosi formasaun ba ekipa, kriasaun sistema alerta antesipada no hametin infraestrutura no ekipamentu iha munisípiu no postu administrativu sira. “Ita labele impede risku hosi dezastre naturál”, maibé ita tenke serbisu hodi “prevene, atu nune’e risku ne’e sai ki’ikoan, no kustus mós ki’ikoan, tantu iha ema no mós prejuízu iha rikusoin sira”, afirma Francisco da Costa Guterres.

Kona-ba orden públika, Ministru destaka katak durante ne’e Governu monitoriza no aplika medidas rigorozas hodi garante kumprimentu ba suspensaun atividades Artes Marsiais no promove revizaun ba lejizlasaun relevante, ho objetivu atu hamenus violénsia no hametin koezaun sosiál. Nia mós akresenta katak Ministériu prepara hela Lei Mediasaun ida hodi permite rezolusaun konflitus komunitárius bazeia ba mekanizmus tradisionais.

Iha planu lejizlativu no institusionál, Ministru subliña katak Governu implementa hela reforma oioin iha ámbitu seguransa nian, inklui halo revizaun ba Estatutu no Lei Orgánika PNTL nian, rejime remunerasaun no regulamentu dixiplinár, no mós atualizasaun ba Lei Seguransa Nasionál no Seguransa Interna, hodi adapta ba realidade atuál país nian.

Ministru destaka mós kooperasaun internasionál ho parseiru oioin, inklui Portugál, Austrália, Japaun, Indonézia, Estadus Unidus, Fransa no Nasoins Unidas, iha área formasaun, kapasitasaun institusionál no modernizasaun forsa no servisu seguransa nian, inklui programa formasaun avansada iha akademia no instituisaun estranjeira sira.

Programa “Página do Governo” hanesan inisiativa ida hosi Gabinete Portavós Governu nian, ne’ebé lidera hosi Ministru Prezidénsia Konsellu Ministrus, Agio Pereira, iha parseria ho RTTL, mídia nasionál no plataforma dijitál sira. Ninia objetivu atu hametin transparénsia governativa no garante asesu populasaun nian ba asaun no desizaun prinsipál sira Ezekutivu nian. Programa ne’e konta ho Nélia Chaves nu’udar aprezentadora no Ika Moniz nu’udar produtora ezekutiva. Apoiu tékniku fornese hosi ekipa mídia Prezidénsia Konsellu Ministrus nian, hosi Gabinete Primeiru-Ministru no gabinete hosi membru Governu ne’ebé hetan entrevista.

Portavós Governu, Ministru Agio Pereira, reafirma katak programa “Página do Governo” hanesan instrumentu importante ida hodi promove prestasaun kontas no diálogu entre Ezekutivu no sidadaun sira.

Governu konvida populasaun tomak atu akompaña edisaun “Página do Governo” ida-ne’e, ne’ebé sei tranzmite iha sesta-feira, loron 24 fulan-outubru tinan 2025, tuku 8 kalan, iha RTTL no iha rede sosiál sira, hodi reforsa kompromisu atu harii sosiedade ida ne’ebé informadu, partisipativa no komprometidu liu ba dezenvolvimentu nasionál.

 

 

▶️ Klik iha ne’e atu haree epizódiu sira hotu iha Youtube
“Página do Governo”