Ministru Prezidénsia Konsellu Ministrus, Agio Pereira, reprezenta Primeiru-Ministru, partisipa iha serimónia sira ne’ebé marka aniversáriu asasinatu Balibó Five nian ba dala 50 no selebrasaun Loron Nasionál Liberdade Imprensa, ne’ebé hala’o ohin, 16 Outubru 2025, iha Balibó, iha munisípiu Bobonaru. 
Eventu ne’e, hala’o ho kolaborasaun entre Governu Timor-Leste, Konsellu Imprensa no Fundasaun Balibó House Trust, konta ho diskursu hosi Ministru Agio Pereira, nune’e mós intervensoins husi Steve Bracks, Patronu husi Balibó House Trust; Embaixadora Nova Zelándia no Austrália nian ba Timor-Leste, Helen Tunnah no Caitlin Wilson; Prezidente Konsellu Imprensa, António Cesar Mali, no Prezidente Autoridade Munisípiu Bobonaru, Paulo Moniz Maia. Serimónia ne’e hetan mós partisipasaun husi hosi reprezentante korpu diplomátiku, jornalista timoroan no internasionál sira, autoridade lokál sira, famílias vítimas no membrus komunidade. Programa ne’e inklui serimónia benvindu tradisionál, momentu reflesaun no omenajen, misa ida iha memória ba vítima sira, entrega prémiu jornalizmu nian no atividade kulturál no komunitária oin-oin.
Selebrasaun sira halo durante semana tomak, inklui lansamentu ba Rádiu Komunidade Fronteira Balibó 5, semináriu ida ho títulu “Reflesaun Nasionál kona-ba Papél Mídia nian iha Rezisténsia no iha Faze Dezenvolvimentu Nasionál”, feira ida ho tema “Liberdade”, nune’e mós aprezentasaun kulturál no inisiativa sira seluk ne’ebé nakloke ba komunidade.
Iha nia diskursu, Ministru Agio Pereira hanoin hikas jornalista australianu na’in-lima—Greg Shackleton, Tony Stewart, Brian Peters, Malcolm Rennie no Gary Cunningham—ne’ebé mate iha Balibó iha loron 16 fulan-outubru tinan 1975, no Roger East, ne’ebé hetan ezekusaun semana balun liutiha iha Dili. Nia subliña katak “tinan limanulu liubá, jornalista joven na’in-lima iha Balibó, no ida iha Dili, hamriik entre silénsiu no mundu. Sira hili lia-loos no selu ho sira-nia vida. Ohin, ita hanoin hikas sira la’ós hanesan figura sira ne’ebé dook, maibé hanesan fó-hanoin ba ita-nia responsabilidade – ita tenke ko’alia, ezije, no foti asaun”.
Ministru subliña mós katak “Balibó Five” no Roger East nia mate “la’ós de’it nota rodapé ne’ebé dook husi istória”, tanba “sira-nia mate nafatin sai kanek ba ita-nia hanoin”, hodi hanoin hikas devér koletivu hodi prezerva memória no garante katak lia-loos nunka tan atu nonook. “Balibó Five nia legadu labele haketak hosi istória Timor-Leste nian – hosi sira-nia luta ba independénsia, polítika rejionál ne’ebé forma nia destinu, no buka internasionál ba lia-loos entre violénsia no negasaun”, nia hatete. 
Agio Pereira hakotu nia diskursu hodi apela “atu aniversáriu ba dala 50 ida-ne’e la’ós serimónia de’it, maibé renovasaun ida: memória, kompromisu no determinasaun atu fó onra ba sira ne’ebé mate, hodi garante katak laiha lian ba lia-loos ne’ebé maka nonook fali”.
Durante serimónia ne’e, sei tau ai-funan iha Flag House, fatin ne’ebé jornalista sira mate, tuir fali vijília ho lilin, ho misa ida ne’ebé prezide hosi Bispu Maliana no hatudu vídeo komemorativu ida ne’ebé marka aniversáriu ba dala 50 trajédia nian. Konsellu Imprensa Timor-Leste no Fundasaun Balibó House Trust sei entrega mós prémiu jornalizmu anuál, hodi fó onra ba kompromisu ba lia-loos, justisa no liberdade espresaun.
*