Primeiru-Ministru Kay Rala Xanana Gusmão hala’o viajen ba munisípiu Vikeke no Baucau iha fin-de-semana iha loron 4 no loron 5 fulan-outubru, hodi lansa projetu konstrusaun estrada no ponte ida iha Vikeke no inaugura kapela ida iha Baguia. 

Iha Vikeke, Primeiru Ministru akompaña husi Ministru Obras Públikas, Samuel Marçal, Xefe Governu halo lansamentu ba projetu reabilitasaun estrada ne’ebé liga suku Luca (Postu Administrativu Vikeke) ba suku Dilor (Postu Administrativu Lakluta), ho distánsia maizumenus kilómetru 14, no tau fatuk dahuluk ba konstrusaun ponte iha mota Welolo, suku Luca. Kontratu ba obra sira ne’e formaliza iha populasaun lokál nia-oin, ne’ebé halo parte iha prioridade Governu Konstitusionál IX nian atu hametin ligasaun rodoviária no garante liután viajen iha área rurál sira ho seguru, hodi hamenus izolamentu, liuliu iha tempu udan. 

 “Estrada ne’ebé ita hahú harii ohin la’ós prezente ida; ne’e hanesan  governu nia devér atu kria kondisaun ne’ebé di’ak ba sirkulasaun transporte, asesu ba bee-moos no eletrisidade ba populasaun”, Primeiru-Ministru afirma, hodi subliña importánsia hosi projetu sira “ne’ebé ezekuta ho di’ak no tuir ninia prazu”.

Primeiru-Ministru no Ministru Obras Públikas husu ba foin-sa’e no komunidade sira atu apoia obras ne’e no evita obstákulu ne’ebé bele atraza ninia ezekusaun. “Projetu ne’e povu nian, halo ba povu no ho objetivu atu serbí povu”, subliña Samuel Marçal. Projetus ne’e envolve investimentu totál besik millaun US$7,5 ba estrada Luca–Dilor no maizumenus millaun US$4,4 ba ponte Welolo, ho períodu ezekusaun fulan 12 nia laran.

Iha munisípiu Baucau, iha suku Afaloicai (Baguia), Primeiru-Ministru inaugura Kapela Buibela-Lena iha serimónia ne’ebé partisipa husi sarani sira, autoridade relijioza sira no komunidade lokál. Iha okaziaun ne’e, nia rekoñese Igreja Katólika nia kontribuisaun iha prosesu luta ba ukun rasik-an no husu ba jerasaun foun atu iha responsabilidade hodi harii nasaun nia futuru liuhosi edukasaun, sidadania ativa no respeitu ba valór sira komunidade nian.

Molok hala’o inaugurasaun, Xefe Governu fó omenajen no tau ai-funan iha semitériu Buibela-Lena. Iha Baguia mós, veteranu rezisténsia ida ho kódigu funu nian “Mau Bulak” entrega dokumentu orijinál sira ne’ebé hakerek durante luta ba libertasaun nasionál nian ba Xanana Gusmão. Dokumentu hirak ne’e sei prezerva didi’ak tanba nu’udar patrimóniu istóriku nasaun nian.

Durante ninia vizita iha munisípiu rua ne’e, Xanana Gusmão rona diretamente populasaun sira-nia preokupasaun, liuliu kona-ba kondisaun estrada sira no difikuldade mobilidade nian, no mós halibur hanoin sira ne’ebé util ba planeamentu no akompañamentu obra sira ne’e. Alende atividade formal, nia mós halo interasaun ho komunidade sira no fahe sasán esensiál ba família, labarik no ferik-katuas sira.

Atividade sira ne’e hetan mós partisipasaun husi membrus Governu no autoridade lokál sira seluk, maka hanesan Ministra Solidariedade Sosiál no Inkluzaun, Verónica das Dores; Vise-Ministru Asuntus Parlamentares, Adérito Hugo da Costa; Vise-Ministru Administrasaun Estatál, Jacinto Rigoberto G. de Deus; Prezidente Autoridade Munisipál Vikeke no Baucau nian, Francisco C. S. de Gonzaga no Veneranda Lemos Martins; nune’e mós membrus Parlamentu Nasionál, lideransa komunitária sira, ekipa téknika sira husi Ministériu Obras Públikas no populasaun.