Ministru Negósius Estranjeirus no Kooperasaun, Bendito dos Santos Freitas, hala’o vizita ofisiál ida ba Vietname no Myanmar iha ámbitu ba ninia misaun diplomátika ba Estadus-Membrus hosi Asosiasaun Nasoins Sudeste Aziátiku (ASEAN), inisiativa ida ne’ebé integra iha prosesu preparasaun Timor-Leste hodi sai membru plenu direitu ba organizasaun ne’e, ne’ebé prevee ona ba Simeira ASEAN ba da-47, ne’ebé sei hala’o iha loron 26 fulan-setembru oin-mai, iha Kuala Lumpur, Malázia. 
Iha Vietnam, Ministru Bendito dos Santos Freitas, iha loron 16 fulan-setembru, hasoru malu ho Primeiru-Ministru, Pham Minh Chinh no Ministru Interinu Negosius Estranjeirus, Le Hoai Trung. Durante sorumutu sira ne’e, nia hato’o agradesimentu kle’an Timor-Leste nian ba Vietname nia apoiu ne’ebé metin ba prosesu adezaun, hodi fó hanoin katak país ne’e hamriik iha Timor-Leste nia sorin dezde aprezentasaun formál ba pedidu adezaun nian iha tinan 2011. Identifika mós área prioridade sira kooperasaun bilaterál nian ba períodu pós-adezaun, inklui agrikultura no seguransa alimentár, turizmu no promosaun kulturál, edukasaun no kapasitasaun profisionál nune’e mós seguransa no defeza, ho foku ba kombate krime sibernétiku no monitorizasaun marítima. Ministru ne’e subliña mós importánsia atu hametin koordenasaun bilaterál hodi asegura kooperasaun ida ne’ebé estruturada iha área ekonómika, polítika, sosiál no kulturál.
Iha Myanmar, Ministru Bendito dos Santos Freitas hasoru malu ho nia omólogu, U Than Swe, iha loron 18 fulan-setembru. Sorumutu ne’e nu’udar oportunidade ida atu troka opiniaun kona-ba aprofundamentu kooperasaun bilaterál no atu reafirma kompromisu hamutuk ba promosaun pás, estabilidade no dezenvolvimentu rejionál, tuir prinsípiu sira husi Karta ASEAN nian. Iha enkontru ne’e, Timor-Leste ofisialmente propoin atu loke Embaixada ida iha Dili no hato’o ninia intensaun atu konklui akordus bilaterais kona-ba izensaun vistus ba titulár pasaporte diplomátiku no servisu, nune’e mós atu avansa mekanizmu fasilitasaun vistus ba objetivu turístiku.
Ministru Bendito dos Santos Freitas nia vizita ba Vietname no Myanmar ne’e hanesan parte ida husi nia vizita ba Estadus-Membrus ASEAN sanulu, tuir pedidu husi Prezidénsia organizasaun ne’e nian. Objetivu hosi inisiativa ida-ne’e mak atu reafirma preparasaun Timor-Leste hodi hola nia fatin nu’udar Estadu-membru ASEAN nian ba da-11 no, iha tempu hanesan, agradese ba apoiu polítiku no tékniku ne’ebé Estadus-Membrus fó durante prosesu tomak preparasaun ba adezaun ne’e.
