Ministru Prezidénsia Konsellu Ministrus, Agio Pereira, hasoru malu ho Prezidente Konsellu Diretivu Imprensa Nasionál Timor-Leste, IP (INTL, IP), Jaime Fernando dos Mártires Carvalho, ho nia ekipa diresaun hodi analiza pontu situasaun instituisaun nian no planu estratéjiku sira ba futuru. Sorumutu ne’e hala’o iha loron 19 fulan-setembru tinan 2025, iha Palásiu Governu.
Iha enkontru ne’e, INTL, IP aprezenta Relatóriu Diagnóstiku instituisaun nian, ne’ebé identifika área prioridade sira ba modernizasaun no reforsu ninia kapasidade. Entre inisiativa sira ne’ebé trasa ona maka reabilitasaun edifísiu, reforsu kapasitasaun ba funsionárius, implementasaun sistema jestaun eletróniku ida ba Jornál Repúblika, produsaun dokumentus seguransa, selebrasaun akordu ida ho Imprensa Nasionál – Casa da Moeda de Portugal, lansamentu estratéjias vizibilidade institusionál nian, no hala’o semináriu públiku ida iha tinan ida-ne’e nia rohan hodi divulga atribuisoins institutu nian. 
Ministru Prezidénsia Konsellu Ministrus rekoñese papél estratéjiku Imprensa Nasionál Timor-Leste, I.P., iha kontestu institusionál nasionál, hodi subliña importánsia atu kontinua reforsa rekursus umanus, liuliu iha formasaun lian portugés, haree ba natureza ofisiál hosi dokumentu sira ne’ebé prodús ona. Nia mós enkoraja ekipa dirijente atu dezenvolve planu komersiál ida ne’ebé sustentável hodi garante instituisaun nia auto-sufisiénsia no modernizasaun iha tinan hirak tuir mai.
Harii iha tinan 1960 ho naran “Imprensa Nasionál”, nia misaun mak atu publika aktu ofisiál sira hosi governu koloniál no prodús formuláriu ofisiál sira. Durante okupasaun Indonézia, nia mantein atividade hanesan ho naran “Badan Percetakan Nasional”. Ho restaurasaun independénsia Repúblika Demokrátika Timor-Leste, ida-ne’e troka naran sai “Gráfika Nasionál”. Iha tinan 2013, nia hahú prosesu transformasaun ida ho aprovasaun ba nia Planu Estratéjiku Reestruturasaun no Modernizasaun, ho objetivu atu transforma neineik nia sai empreza ida ne’ebé moderna no auto-sustentável. Prosesu ida-ne’e lori nia tama iha merkadu nasionál iha tinan 2016, bainhira hahú fornese servisus produsaun gráfika ba entidade privada sira. Iha tinan 2017, sai Instituisaun Públiku no muda nia naran ba naran atuál, “Imprensa Nasionál Timor-Leste”.
