Dili, loron 10 fulan-setembru tinan 2025 – Governu Timor-Leste lansa ofisiálmente konsulta públika online ida kona-ba Ekonomia Azul: Polítika no Planu Asaun ba Promosaun Ekonomia Marítima ida ne’ebé Reziliente no Sustentavel iha Timor-Leste, 2025 – 2035.
Konsulta públika ne’e sei hala’o husi loron 11 to’o 30 fulan-setembru tinan 2025 no nu’udar pasu importante ida iha avansu ajenda dezenvolvimentu sustentavel no diversifikasaun ekonómika Timor-Leste nian.
Polítika ne’ebé aprova “iha prinsípiu” husi Konsellu Ministrus, iha fulan-juñu tinan 2025, reflete vizaun barani Timor-Leste nian ba abordajen moderna ida, ne’ebé responsavel ba ambiente no sentradu iha ema, ho objetivu ba dezenvolvimentu sustentável nasaun nian. Polítika no Planu Asaun nia intensaun atu sai roteiru ida ba kreximentu integradu no inkluzivu ba setór kosteirus, mariñus no marítimus país nian.
Ezbosu ba konsulta ne’e tau tasi iha sentru estratéjia dezenvolvimentu nasionál país nian. Timor-Leste afirma papél tasi nian, nu’udar baze prinsipál ba identidade nasaun nian no fonte vitál ba valór ekonómiku, sosiál, kulturál no ambientál.
Iha Timor-Leste, Ekonomia Azul define nu’udar polítika no asaun integrada lubuk ida ne’ebé promove dezenvolvimentu ekonómiku no sosiál liuhosi utilizasaun sustentavel rekursus mariñus no kosteirus, bazeia ba prátikas ambientais ne’ebé metin. Abordajen ida-ne’e fó énfaze ba diversifikasaun, inkluzaun no ekilíbriu ekolojia ba tempu naruk.
Dokumentu ne’e estruturadu iha parte prinsipál tolu. Parte I inklui Introdusaun no Enkuadramentu Jerál; Parte II inklui Kuadru Estratéjiku Polítikas nian; no Parte III maka Planu Asaun ba implementasaun Ekonomia Azul iha Timor-Leste durante tinan sanulu oinmai, husi tinan 2025 to’o 2035.
Tuir kompromisu Governu Konstitusionál IX nian kona-ba transparénsia, inkluzaun no governasaun partisipativa, faze daruak ba konsulta nasionál sira ne’ebé envolve prezidentes autoridades munisipais, administradores postus administrativus no xefe suku sira sei hala’o iha fulan-outubru tinan 2025, iha Dili, tuir fali ho enkontru prezensiál iha komunidades no sosializasaun polítika iha Timor-Leste laran tomak, iha tinan 2026. Faze ida-ne’e sei lidera husi Primeiru-Ministru Kay Rala Xanana Gusmão, ne’ebé lidera hela dezenvolvimentu Ekonomia Azul Timor-Leste nian.
Governu enkoraja parte interesada sira hotu, inklui sosiedade sivíl, organizasaun naun-governamentál sira, akademia, grupus komunitárius, setór privadu, parseirus dezenvolvimentu, nune’e mós indivíduu sira ne’ebé iha interese, atu partisipa ativamente iha prosesu ida-ne’e, hodi fornese kontributus ne’ebé sei kontribui ba finalizasaun polítika no ninia implementasaun iha futuru. Partisipasaun ne’ebé luan ne’e importante tebetebes atu garante katak Polítika no Planu Asaun Ekonomia Azul Timor-Leste nian reflete aspirasaun, koñesimentu, no nesesidade povu Timor-Leste nian.
Atu hetan kópia ida hosi ezbosu Polítika no Planu Asaun Ekonomia Azul Timor-Leste nian, no mós ninia formuláriu ba komentárius, favór ida, dijitaliza kódigu QR iha kraik:
-REMATA-
