Governu Timor-Leste, liuhosi Ministériu Dezenvolvimentu Rurál no Abitasaun Komunitária no Ministériu Planeamentu no Investimentu Estratéjiku, iha kolaborasaun ho parseiru dezenvolvimentu sira, hala’o enkontru ida iha loron 1 fulan-setembru tinan 2025, iha auditóriu Ministériu Finansas nian, hodi hahú preparasaun Roteiru Nasionál ba Dezenvolvimentu Merkadu Abitasaun nian. Inisiativa ida-ne’e mosu hosi aprovasaun, hosi Konsellu Ministrus, iha reuniaun iha loron 27 fulan-agostu tinan 2025, ba projetu Rezolusaun Governu nian ne’ebé estabelese Komisaun Diretiva responsavel ba elaborasaun Roteiru refere. 

Rezolusaun ne’e prevee formasaun ba Komité Diretivu ida ne’ebé kompostu husi membru governu sira, ho apoiu husi Grupu Traballu Tékniku ida ne’ebé iha knaar atu prepara, halo revizaun no finaliza Roteiru Nasionál. Dokumentu ida-ne’e sei define estratéjia no mekanizmu atu implementa, monitoriza no avalia polítika públika ne’ebé ho objetivu atu hadi’a kondisaun moris iha Timor-Leste laran tomak.

Medida ne’e hatán ba ezijénsia ne’ebé aumenta ba abitasaun no nesesidade atu garante solusaun abitasaun ne’ebé dignu no adekuadu ba sidadaun sira, hanesan prevee ona iha Konstituisaun no Programa Governu Konstitusionál da-9 nian. Objetivu sentrál mak atu estabelese enkuadramentu ida ne’ebé koordenadu no sustentável ba dezenvolvimentu merkadu abitasaun nian, ne’ebé envolve instituisaun públika sira, setór privadu no parseiru dezenvolvimentu sira, hodi garante solusaun abitasaun nian ne’ebé efikás no baratu ba populasaun.

Partisipa iha sesaun aprezentasaun Roteiru Abitasaun maka Vise-Primeiru-Ministru no Ministru Dezenvolvimentu Rurál no Abitasaun Komunitária, Ministru Planeamentu no Investimentu Estratéjiku, Ministru Justisa, Vise-Ministra Solidariedade Sosiál no Inkluzaun, Governadór Banco Central de Timor-Leste, reprezentantes hosi Banku Mundiál iha Timor-Leste, Banku Mandiri, BNU, Kaebauk, no parseiru sira seluk tan.