Ministru Transportes no Komunikasoins, Miguel Marques Gonçalves Manetelu, lidera delegasaun Timor-Leste ne’ebé partisipa iha Simpóziu Globál Uniaun Internasionál Telekomunikasoins (GRS-25) nian, ne’ebé hala’o iha Riade, kapitál Arábia Saudita, hosi loron 31 fulan-agostu to’o loron 2 fulan-setembru. 
Sorumutu ne’e reúne reguladór, desizór polítiku no reprezentante sira setór dijitál nian husi mundu tomak ho tema <<Regulasaun ba dezenvolvimentu dijitál sustentavel>>, hodi fornese plataforma globál ida atu partilla koñesimentu no kooperasaun internasionál. 
Iha Segmentu Altu Nivel simpóziu nian, Ministru Manetelu aprezenta estratéjia dijitál nasionál, bazeia ba pilár rua: alkansa konektividade universál liuhosi investimentu públiku iha infraestrutura esensiál sira no promove konkorrénsia iha servisu rede asesu lokál nian, iha tempu hanesan hasa’e transformasaun dijitál iha setór governu eletróniku, saúde, edukasaun, agrikultura no ekonomia dijitál. “Ami-nia intervensaun sira iha Riade subliña prinsípiu fundamentál ida: inkluzaun dijitál la’ós de’it kona-ba harii rede – maibé kona-ba harii futuru”, dehan Ministru. “Ho estabelese parseria estratéjika sira no investe iha inovasaun, ami garante katak nasaun ki’ik sira mós bele mehi boot no garante katak laiha sidadaun ida maka hela iha kotuk iha era dijitál.”
Durante simpóziu ne’e, delegasaun timoroan hala’o enkontru bilaterál ho país parseiru sira. Nia sorumutu ho Ministru Komunikasoins, Informasaun no Teknolojia Reinu Arábia Saudita nian, Abdullah Alswaha, parte rua ne’e konkorda atu kria ekipa téknika ida hodi dezenvolve projetu prátiku kooperasaun nian iha área dijitalizasaun transportes, governu eletróniku, edukasaun dijitál no telemedisina. Ministru Manetelu subliña importánsia atu reforsa kapitál umanu timoroan nian liuhusi formasaun, programas interkámbiu no semináriu tékniku sira, no mós posibilidade atu formaliza kuadru foun parseria ida-ne’e liuhusi Memorandu Entendimentu ida. “Distánsia fízika entre ita-nia país la’ós ona obstákulu ida ba kolaborasaun. Ho teknolojia sira ne’ebé ita iha, ita presiza vontade no motivasaun atu transforma ita-nia diskusaun sai rezultadus ne’ebé bele ajuda ita-nia povu”, nia deklara.
Delegasaun timoroan hala’o mós konversas ho reprezentante sira Repúblika Populár Xina nian, durante sorumutu ne’e Timor-Leste afirma ninia apoiu ba kandidatura xineza nian hodi sai uma-na’in ba Konferénsia Mundiál Radiukomunikasoins UIT iha tinan 2026 (WRC26), iha Xangai, hodi reforsa ninia kompromisu ba kooperasaun multilaterál iha organizasaun ne’e nia laran.
