Programa “Página do Governo” edisaun da-12 ho konvidadu Ministru Transportes no Komunikasoins, Miguel Marques Gonçalves Manetelu, iha sesta-feira, loron 5 fulan-setembru, tuku 8 kalan, iha Rádiu no Televizaun Timor-Leste (RTTL) no iha plataforma dijitál sira. Iha edisaun ida-ne’e, Ministru Miguel Manetelu aprezenta konkista no prioridade prinsipál sira Ministériu nian, ho foku ba projetus estratéjikus konstrusaun Aeroportu Dili no instalasaun kabu fibra ótika nian, inisiativa esensiál sira hodi reforsa mobilidade no konektividade dijitál país nian. 
Iha entrevista ne’e, Ministru esplika katak “bazeia ba orgánika Governu Konstitusionál IX, Ministériu Transportes no Komunikasoins maka Departamentu Governamentál ida ne’ebé define, koordena, ezekuta no avalia polítikas iha área transportes no komunikasoins, nune’e mós meteorolojia, sizmolojia no mós servisus postais.” Entre ninia kompeténsia sira ne’e, inklui regula servisus komunikasaun, promove inovasaun teknolójika, integra infraestruturas transporte aéreu, marítimu no terrestre, no mós dezenvolve projetu modernizasaun hanesan Aeroportu Dili no kabu fibra ótika.
Ida husi projetu sentrál sira ne’ebé Ministru subliña maka dezenvolvimentu no expansaun Aeroportu Internasionál Prezidente Nicolau Lobato, ne’ebé konsidera hanesan “odamatan entrada importante ida ba Timor-Leste” no “prioridade” ida husi Programa Governu IX nian. Governante ne’e rekorda prosesu ne’e nia fase balu, hahú husi estudu dahuluk to’o faze ezekusaun atuál, no aborda “kompleksidade ba konstrusaun aeroportu refere”, hodi hatudu esperansa katak “aeroportu ne’e sei hetan inaugurasaun durante mandatu Governu IX nian”.
Miguel Manetelu hatutan tan katak “terminál ne’ebé sei harii agora kalkula sei simu ema millaun 1,2 iha tinan 2054″, hodi esplika katak estensaun pista “sei realiza iha faze tolu”, maka hanesan “faze dahuluk korresponde ba estensaun pista ba metru rihun rua atus ida, kompara ho atuál metru rihun ida atus ualu limanulu”. “Faze daruak sei to’o metru rihun rua atus lima, no faze datoluk sei to’o metru rihun tolu, aleinde alargamentu ida ba pista husi metru atuál tolunulu ba metru haatnulu-resin-lima”.
Relasiona ho konektividade dijitál, Governante ne’e afirma katak “bainhira ita-nia rede fibra ótika prontu ona (…), velosidade internet sei lais no baratu liu”. Nia subliña mós relevánsia husi infraestrutura ida-ne’e ba implementasaun Governu Eletróniku no dijitalizasaun, destaka katak “bainhira ita ko’alia kona-ba dijitalizasaun, laiha internet ida ne’ebé di’ak, dijitalizasaun sei la funsiona. Ho prezensa kabu fibra ótika, prosesu dijitalizasaun sei sai fasil liután, tantu iha setór públiku no mós iha prestasaun servisu barak liután ba ita-nia joven sira no ita-nia komunidade.”
Iha entrevista ne’e nia rohan, Ministru aprezenta ninia vizaun ba futuru setór ne’e nian, hodi manifesta objetivu atu alkansa “sistema transporte ida ne’ebé bele fasilita duni ita-nia sirkulasaun, mobilizasaun ema no sasán husi fatin ida ba fatin seluk ho seguru.” Aleinde ne’e, nia mós espresa vontade atu garante “sistema komunikasaun ida ne’ebé seguru, atu nune’e ema hotu-hotu bele tau konfiansa ba sistema ne’e. Ita hakarak sistema internet ida ne’ebé baratu no lais, hodi fasilita ita-nia sidadaun, joven no alunu sira.”
Ministru mós bolu atensaun ba “populasaun tomak nia partisipasaun, no liu-liu ba ita-nia joven sira”, hodi fó hanoin katak “bainhira Estadu monta ekipamentu ruma, ema hotu-hotu tenke tau matan ba ida-ne’e, tanba ita uza hela osan povu nian. Partisipasaun husi populasaun no joven sira importante tebes iha prosesu dezenvolvimentu.”
Programa “Página do Governo” hanesan inisiativa ida hosi Gabinete Portavós Governu nian, ne’ebé lidera hosi Ministru Prezidénsia Konsellu Ministrus, Agio Pereira, iha parseria ho RTTL, média nasionál no plataforma dijitál sira. Ninia objetivu maka hametin transparénsia governamentál no garante asesu populasaun nian ba informasaun sira kona-ba asaun no desizaun prinsipál sira Ezekutivu nian. Programa ne’e konta ho Nélia Chaves nu’udar aprezentadora no Ika Moniz nu’udar produtora ezekutiva. Apoiu tékniku fornese hosi ekipa mídia Gabinete Primeiru-Ministru nian, hosi Prezidénsia Konsellu Ministrus no gabinete hosi membru Governu ne’ebé hetan entrevista..
Portavós Governu, Ministru Agio Pereira, reafirma katak programa “Página do Governo” hanesan instrumentu importante ida hodi promove prestasaun kontas no diálogu entre ezekutivu no sidadaun sira.
Governu konvida populasaun tomak atu akompaña edisaun “Página do Governo” ida-ne’e, ne’ebé sei tranzmite iha sesta-feira, loron 5 fulan-setembru tinan 2025, tuku 8 kalan, iha RTTL no iha rede sosiál sira, hodi reforsa kompromisu atu harii sosiedade ida ne’ebé informadu, partisipativa no komprometidu liu ba dezenvolvimentu nasionál.
▶️ Klik iha ne’e atu haree epizódiu sira hotu iha Youtube
“Página do Governo”
