……………………………………………………………………………………………………………
Loron 20, fulan-agostu, tinan 2025
Komunikadu Imprensa
Governu Hato’o Parabéns ba Povu Timoroan iha Aniversáriu FALINTIL nian ba dala 50
Governu Konstitusionál IX hato’o parabéns ba povu timoroan tomak ba selebrasaun Aniversáriu Forsa Armada Libertasaun Nasionál Timor-Leste (FALINTIL) ba dala 50, data istóriku ne’ebé marka meiu sékulu rezisténsia, korajen no sakrifísiu iha luta ba liberdade no independénsia nasionál.
Iha momentu ida-ne’e importánsia tebes ba memória koletiva nasaun nian, Governu fó omenajen ba kombatente FALINTIL sira hotu, liuliu mártir sira nasaun nian ne’ebé fó sira-nia vida ba autodeterminasaun ideál povu timór. Aten-barani, reziliénsia, no espíritu sakrifísiu hosi kombatente liberdade sira-ne’e kontinua inspira jerasaun sira no haburas valór fundamentál sira ita-nia Nasaun nian.
Selebra Loron FALINTIL maka, ás liu buat hotu, jestu agradesimentu no kompromisu ida ba nasaun nia istória. Nune’e mós oportunidade úniku ida ba foin-sa’e sira atu aprende kona-ba, apresia, no fó onra ba FALINTIL nia papél desizivu hodi hetan independénsia no afirma identidade nasionál. Loron ne’e konvida reflesaun kona-ba jornada koletiva povu timoroan nian, hodi hametin patriotizmu no promove ideia dame, justisa, no unidade.
Governu destaka mós katak selebrasaun ba eventu ida-ne’e hanesan oportunidade exelente ida hodi halibur líder nasionál, autoridade sivíl no militár sira, antigu-kombatente no sidadaun sira ein jerál – ho apelu espesiál ida ba foin-sa’e sira – atu, hamutuk, fó omenajen ba eroi sira libertasaun nasionál nian, hodi rekoñese mós kontinuidade hosi sira-nia legadu iha atuál Forsa Defeza Timor-Leste nian (F-FDTL).
Iha loron 30 fulan-jullu liubá, Konsellu Ministrus aprova ona Rezolusaun Governu ida kona-ba komemorasaun Aniversáriu FALINTIL ba dala 50, ne’ebé prevee hala’o eventu iha munisípiu hotu-hotu iha territóriu tomak. Selebrasaun sira ne’e hahú iha loron 18 fulan-agostu iha munisípiu Lautein, Baukau, Vikeke, Manatutu, Manufahi, no Likisá, tuir fali iha loron 19 fulan-agostu iha Ainaru, Kovalima, Bobonaru, Ermera, Aileu, Rejiaun Administrativa Espesiál Oekusi Ambenu, no Ataúru, no iha loron 20 fulan-agostu selebrasaun finál iha sidade Dili. Programa komemorativu ne’e inklui serimónia militár, parada, misa, konferénsia, vizita ba semitériu martir sira nian, inisiativa kulturál, no asaun solidariedade sivíl-militár, iha omenajen nasionál loloos ida ba luta libertasaun.
Iha programa sira ne’ebé destaka ona iha Díli, realiza mós konferénsia internasionál ida ne’ebé organiza hosi g7+, parada militár ida iha Largo Tasitolu, diskursu hosi figura boot sira Estadu ne’e nian, kondekorasaun, atividade kulturál, konsertu ho artista nasionál no internasionál sira no asinatura Protokolu ba konstrusaun Ospitál Militár Forsa Armada nian ho Repúblika Populár Xina.
Ministru Prezidénsia Konsellu Ministrus no Portavós Governu, Agio Pereira, afirma katak “FALINTIL simboliza reziliénsia no dignidade povu timoroan nian. Selebra aniversáriu ida-ne’e hanesan dalan ida atu reafirma ita-nia istória, fó onra ba ita-nia eroi sira, no hafoun fali ita-nia kompromisu ba futuru ida ne’ebé nakonu ho dame, koezaun no dezenvolvimentu. Ida-ne’e mós hanesan oportunidade foun ida hodi fó inspirasaun ba ita-nia jerasaun sira, ne’ebé hetan responsabilidade atu kontinua harii nasaun ida ne’ebé livre, demokrátiku no soberanu.”
Governu apela ba populasaun tomak atu partisipa ativu iha komemorasaun sira ne’e, hodi fó omenajen ba memória kombatente sira libertasaun nian no afirma valór unidade nasionál, pás, no justisa ne’ebé maka FALINTIL sira sempre luta ba. REMATA