Timor-Leste Manifesta Solidariedade ho Cabo Verde tanba Udan Boot ne’ebé Estraga País ne’e
Prezidénsia Konsellu Ministrus
Portavós Governu Timor-Leste
IX Governu Konstitusionál
...........................................................................................................................
Loron 15, fulan-agostu, tinan 2025
Komunikadu Imprensa
Timor-Leste Manifesta Solidariedade ho Cabo Verde tanba Udan Boot ne’ebé Estraga País ne’e
Governu Timor-Leste manifesta ninia solidariedade ne’ebé kle’an ho Governu no Povu Repúblika Cabo Verde, liu-liu ho komunidade sira husi Illa São Vicente no Illa viziña sira ne’ebé afetadu husi udan boot ne’ebé akontese iha segunda-feira madrugada, loron 11 fulan-agostu tinan 2025.
Iha São Vicente, uma no estrada sira hetan estragus, ponte aat no bairru sira hetan inundasaun. Iha Santo Antão no São Nicolau mós hetan estragus makaas. Haree ba gravidade hosi situasaun ne’e, Governu kabuverdianu dekreta ona lutu nasionál durante loron rua no deklara situasaun kalamidade ba periodu fulan neen iha munisípiu tolu, ho objetivu atu permite mobilizasaun rekursus ne’ebé urjente. Volume udan, liuliu iha São Vicente, atinje nivel ne’ebé molok ne’e nunka akontese, ho relatus kona-ba destruisaun ne’ebé molok ne’e la rejista iha rejiaun refere.
Ministru Prezidénsia Konsellu Ministrus no Portavós Governu nian, Agip Pereira, afirma: “Lori Governu Timor-Leste nia naran, ha’u tranzmite ba Povu no Governu Cabo Verde ami-nia solidariedade iha momentu susar ida-ne’e. Ami partilla tristeza ho família enlutada sira- no ami reforsa amizade ne’ebé halibur ita-nia país, ne’ebé fiar iha forsa no iha reziliénsia Povu kabuverdianu nian hodi ultrapasa trajédia ida-ne’e .”
Governu Timor-Leste reafirma lasu fraternidade forte ne’e halibur ita-nia povu iha Komunidade País Lian Portugeza no tranzmite sentidas kondolénsias ba família enlutada sira no ema hotu-hotu ne’ebé hasoru konsekuénsias husi kalamidade ida-ne’e. REMATA
