Ministru Prezidénsia Konsellu Ministrus, Agio Pereira, hasoru malu iha loron 12 fulan-agostu tinan 2025, ho Diretór Ezekutivu AMRT nian, Jorge Alves “We Moris” , ho nia ekipa hodi ko’alia kona-ba preparasaun atividades kulturais iha aniversáriu fundasaun FALINTIL nian. Iha sorumutu ida-ne’e, ekipa AMRT aprezenta kona-ba preparasaun ba serimónias kulturais ne’ebé sei hala’o iha loron 14 fulan-agostu tinan 2025 iha ámbitu komemorasaun Luta Libertasaun Nasionál nian ba da-50. 

Diretór Ezekutivu nee hateten katak tinan ida-ne’e, Timor-Leste selebra tinan 50 ba eventu istóriku fundamentál ba ita-nia identidade no soberania, hanesan Nicolau Lobato nia viajen eroika iha loron 11 fulan-agostu tinan 1975, insurreisaun armada jerál iha tinan 1975, harii Falintil iha loron 20 fulan-agostu tinan 1975; no proklamasaun independénsia unilaterál iha loron 28 fulan-novembru tinan 1975. Ho razaun sira-ne’e hotu, AMRT sei realiza serimónias kulturais ne’ebé maka sei lidera husi Lia-na’in Bidau Manu Mata, Karketu Mota Ain no Lakotu Rumbia, hanesan reprezentante uma lisan tradisionál hosi munisípiu iha 12 munisípiu no Rejuan Administrativa Espesial Oe-Cusse. Serimónia sira-ne’e sei hala’o iha loron 14 fulan-agostu tinan 2025. Diretór Ezekutivu nee informa tan katak atividade balun  AMRT nian sei halo iha Munisipiu Aileu, hodi fó onra ba insurreisaun jerál armada no ba fundasaun FALINTIL iha Munisípiu Aileu. 

Iha loron 17 fulan-agostu tinan 2025, sei iha mós selebrasaun Eukaristia no bénsaun ba imajen Nossa Senhora de Fátima, hanesan mahein ba Arquivo e Museu da Resistência Timorense.

Ministru Agio Pereira hato’o parabens ba preparasaun husi ekipa AMRT nian ne’ebé mak di’ak tebes, no mai ho konseitu ne’ebé detalladu ba programa ne’ebé mak aprezenta no sei hala’o iha AMRT no iha Aileu. Ministru Agio subliña katak importante ba jerasaun foun sira atu hatene istória ita-nia gerrilleiru sira-nian ho loloos no fó valór ba sira-nia luta, hodi konta loloos sira-nia istória. REMATA